Andreı Arshavın «Qazsport»-tyń kommentatory bolady
ASTANA. QazAqparat - Búgingi kúni qazaqstandyq «Qaırat» fýtbol klýbynyń sapynda oınap júrgen Andreı Arshavın «Qazsport» arnasynan tikeleı kórsetiletin 2018 jylǵy Álem chempıonatyn júrgizetin bolady. Bul týraly «Qazsport» telearnasynyń dırektory Pavel Tsybýlın aıtty, dep habarlaıdy QazAqparat.
«Qazaqstan» ulttyq arnasynyń «Túngi stýdııa» baǵdarlamasynda qonaqta bolǵan reseılik fýtbolshy Andreı Arshavın 2018 jylǵy Álem chempıonatynyń «Qazsport» arnasyndaǵy tikeleı efıri barysynda kommentator bolýy múmkindigin aıtqan bolatyn.
«Qazsport»-tyń resmı saıtynda telearna dırektory Pavel Tsıbýlınniń buǵan qatysty pikiri berilgen.
«Baǵdarlamada Andreı 2018 jylǵy Álem birinshiligine kommentatorlyq etýge qarsy emestigin ázil arqyly bildirdi. Biz árıne, tek «ıá» deımiz. Birinshiden, Arshavın postkeńestik keńistikte sońǵy onjyldyqtaǵy úzdik oıynshylardyń biri. Ekinshiden, tanymal almatylyq klýbtyń kóshbasshylarynyń qatarynda. Úshinshiden, Álem birinshiligi Reseıde ótedi. Bul da qyzyǵýshylyq týdyratyn sebep», - deıdi telearna dırektory.
P.Tsıbýlın fýtbolshyny birge jumys isteýge shaqyratynyn atap ótti.
«Oıdyń ázil túrinde aıtylǵanyna qaramastan, biz jarystar kezinde ony birlese jumys isteýge shaqyramyz. Aıta ketsek, «Qazaqstan» jáne «Qazsport» telearnalary bul iri sporttyq sharany translıatsııalaýdyń eksklıýzıvti quqyǵyna ıe. Arshavın qazaqstandyq Premer-lıga oıyndarynan bos kúnderi kommentatorlyq etýi múmkin. Sondaı-aq, Álemdik chempıonat aıasyndaǵy stýdııalyq baǵdarlamadan kórinýi múmkin. Jalpy, biz kommentator retinde qazaqstandyq fýtbolshylardy kórgizim keledi. Olar qazirgi oıynshylar nemese sporttyq mansabyn aıaqtaǵandar. Biraq, olardyń kommentatorlyq etpeý jáne sarapshylyq jasamaý úshin túrli sebepter aıtatyn sırek jaǵdaılar kezdesedi. Degenmen, fýtboldyń mánin olardan artyq eshkim bilmeıdi», - dep atap ótti ol.
Budan bólek, telearna basshysy «Qazsport»-ta kommentatorlarǵa irikteý júrip jatqanyn aıtyp ótti. Birinshi kezeń nátıjesi boıynsha 503 úmitkerdiń 271-si kastıngten ótýge shaqyrtý aldy. Ekinshi kezeńge 47 adam joldama aldy. Aldaǵy ýaqytta olardyń tek 20-sy iriktep alynady. Keıin telearnanyń kazsporttv.kz saıtynda daýys berý arqyly úzdik ondyq anyqtalady. Olardyń kandıdatýralary Korporatsııanyń kórkemdik keńesinde qaralatyn bolady. Kórkemdik keńeske fılologtar, jýrnalıster, blogerler, BAQ basshylary, sport federatsııalarynyń ókilderi jáne Olımpıada chempıondary kiredi. Kastıng jeltoqsan aıynda tolyǵymen aıaqtalyp, jańa kommentatorlar jumystaryna 2018 jyldan bastap kirisetini kútilýde.
