Andreı Arshavın kelesi maýsymda «Qaırat» sapynda qalatyn boldy
ASTANA. QazAqparat - «Qazaqstan» ulttyq telearnasyndaǵy «Túngi stýdııa» baǵdarlamasyna meıman bolyp kelgen reseılik fýtbolshy Andreı Arshavın kelesi maýsymda «Qaırat» fýtbol klýbynyń sapynda qalatynyn aıtty, dep habarlaıdy «QazAqparat» HAA tilshisi.
«Túngi stýdııa» baǵdarlamasynyń júrgizýshisi Nurlan Qoıanbaev suraq-jaýap barysynda Arshavınge «Qaırat» sapynda oıyndy jalǵastyrý jóninde saýal qoıǵan bolatyn. Alaıda saýalǵa aldymen «Qaırat» fýtbol klýbynyń qadaǵalaý keńesiniń tóraǵasy Qaırat Boranbaev til qatty.
«Andreı sekildi álemdik ataǵy bar fýtbolshylardyń bizdiń elde óner kórsetýi biz úshin zor maqtanysh. Andreı bizge kelgen kezde aǵylshyn baspasózinde kóptegen maqalalar jaryqqa shyqty. Sondyqtan, áıgili fýtbolshylar bizge kelip jatsa, bul bizdiń fýtbolymyzdy tanytýǵa úlken múmkindik der edim. Olardyń álbette tájirıbeleri zor. Andreıdi men sońǵy 10 jyldaǵy Reseıdegi eń úzdik fýtbolshy der edim. Andreı bizde kelesi jylǵa qalý týraly usynysymyzdy qabyl alar degen senimdemin», - deıdi «Qaırat» fýtbol klýbynyń qadaǵalaý keńesiniń tóraǵasy Qaırat Boranbaev.
Nurlan Qoıanbaev osydan keıin Andreı Arshavınge quramada qalatyny nemese qalmaıtyny týraly «ázilsiz» tike suraq qoıdy.
«Qalamyn», - degen Andreıdiń bir aýyz sózin kórermender zor qoshemetpen qabyl aldy.
Eske sala ketsek, 36 jastaǵy Andreı Arshavın 2016 jyldan beri «Qaırat» sapynda óner kórsetip júr. Fýtbolshy 2009-2013 jyl aralyǵynda «Arsenal» komandasynyń quramynda dop tepken.
