Andreı Arshavın Qazaqstan Chempıonatynyń úzdik fýtbolshysy atandy
ASTANA. QazAqparat - Qazaqstannyń kásipqoı fýtbol lıgasy tamyz aıyndaǵy Qazaqstan Chempıonatynyń úzdik bapkeri men fýtbolshysyn tańdaýǵa arnalǵan dástúrli saýalnamanyń qorytyndysyn jasady. Bul jóninde QKFL Vkontakte jelisinde málim etti.
Ádettegideı daýys berýge Premer-lıga komandalarynyń jetekshileri qatysty.
Aıdyń úzdik fýtbolshysyn anyqtaý barysynda saýalnama respondentteriniń árqaısysy úsh oıynshynyń ishinen bireýin ataǵan. Budan keıin olarǵa ornalasqan oryndaryna baılanysty upaı berilgen. 1-shi orynǵa - 3 upaı; 2-shi orynǵa - 2, úshinshi orynǵa - 1. Barlyq upaılar qosylǵan soń qorytyndy jasaldy.
Úzdik bapkerdi anyqtaý kezinde saýalnamaǵa jaýap berýshiler bir nusqadan tańdady.
Saýalnama nátıjesi mynadaı: ótken aıdyń Premer-lıgasynyń úzdik oıynshysy bolyp «Qaırattyń» shabýyldaýshy jartylaı qorǵaýshysy Andreı Arshavın tańdaldy. Sportshy jalpy 20 upaı jınaǵan.
Tamyz aıynyń úzdik bapkeri ataǵyn «Jetisýdyń» bapkeri Dmıtrıı Ogaı men «Atyraýdyń» jattyqtyrýshysy Vıktor Kýmykov ózara bólisti. Qos maman 4 upaıdan jınaǵan.
