Andreı Arshavın «Qaırattan» ketti
ASTANA. QazAqparat - Almatylyq «Qaırat» fýtbol klýby 37 jastaǵy reseılik fýtbolshy Andreı Arshavınmen qoshtasty, dep habarlaıdy QazAqparat.
«Rahmet, Andreı Sergeevıch!», - degen jazba qaldyryldy «Qaırat» FK Instagram paraqshasynda.
Aıta keterligi, reseılik búgin almatylyq klýbtyń sapynda qoshtasý matchyn ótkizgen bolatyn. Arshavın ekinshi taımda alańǵa shyǵyp, qos komandanyń arasyndaǵy kezdesý 0:0 esebimen aıaqtaldy.
«Qaırat» sapynda úsh maýsym ótkizgen Andreı Arshavın 100 matchta 30 gol salyp, 37 nátıjeli paspen jankúıerlerdiń esinde qaldy. Klýbpen birge ol úsh ret el chempıonatynyń kúmis medalin, Qazaqstannyń Kýbogy men Sýperkýbogyn ıelendi. Buǵan deıin Andreı fýtboldan ketetinin habarlap, «Qaırattan» keıin basqa klýbtarmen kelisimge kelýdi oılastyryp otyrmaǵanyn aıtqan edi.
Andreı Arshavın «Qaırat» komandasyna 2016 jyldyń naýryz aıynda kelgen bolatyn. Jartylaı qorǵaýshy oǵan deıin «Zenıt» quramynda oınap, «Zenıtpen» birge ÝEFA Kýbogy men Sýperkýbogynda jeńiske jetip, Eýropa chempıonatynyń qola júldegeri atanǵan bolatyn.
