Andorra syrtqy ister mınıstri Qazaqstanda taý shańǵysy týrızmin damytýǵa qyzyǵýshylyq tanytty

NUR-SULTAN. QazAqparat – QR Premer-Mınıstri Álıhan Smaıylov Qazaqstanǵa resmı saparmen kelgen Andorra syrtqy ister mınıstri Marııa Ýbahpen kezdesý ótkizdi, dep habarlaıdy QazAqparat Úkimettiń resmı saıtyna silteme jasap.

Taraptar saýda-ekonomıkalyq jáne ınvestıtsııalyq yntymaqtastyq, týrızm salasyndaǵy ózara is-qımyl, sondaı-aq halyqaralyq uıymdar sheńberinde ekijaqty dıalogty nyǵaıtý máselelerin talqylady.

Álıhan Smaıylov Qazaqstan men Andorra arasyndaǵy saýda-ınvestıtsııalyq yntymaqtastyqty damytý áleýeti tolyq ashylmaǵanyn atap ótti. Premer-Mınıstrdiń pikirinshe, bul rette týrızm salasyndaǵy ekijaqty baılanystardy keńeıtý erekshe qyzyǵýshylyq týdyrady.

«Qazaqstan týrızmniń barlyq túrin damytý úshin aıtarlyqtaı áleýetke ıe. Osy baǵyttaǵy tájirıbelerińizdi eskere otyryp, ózara tıimdi birlesken jobalardy iske asyrýǵa shaqyramyz», - dedi Álıhan Smaıylov.

Úkimet basshysy búgin qol qoıylǵan Azamattardyń saparlary kezinde vızalyq talaptardan ózara bosatý týraly kelisimniń mańyzdylyǵyn atap ótti.

«Bul qujat ekijaqty baılanystardy odan ári damytýǵa jáne týrıstik aǵyndy arttyrýǵa qosymsha serpin beretinine senimdimin», - dedi Premer-Mınıstr.

Óz kezeginde Marııa Ýbah Andorra da ózara kooperatsııany nyǵaıtý úshin jańa múmkindikter izdeýge múddeli ekenin atap ótti.

«Bizdiń oıymyzsha, taý shańǵysy týrızmin damytý – perspektıvaly baǵyt. Nur-Sultanǵa deıin men Almatyda, onyń ishinde týrıster arasynda keńinen tanymal «Shymbulaq» kýrortynda boldym. Osy salada jańa baılanystar ornata alamyz dep oılaımyn», - dedi Marııa Ýbah.

Kezdesý sońynda Álıhan Smaıylov Marııa Ýbahtyń sapary Andorranyń Qazaqstanmen yntymaqtastyqty damytýǵa jáne ekonomıkalyq baılanystardy nyǵaıtýǵa múddeli ekendiginiń mańyzdy aıǵaǵy ekenin atap ótti.

Foto: primeminister.kz