Ándi jandy daýyspen aıtqan durys – Nurlan Nyǵmatýlın
NUR-SULTAN. QazAqparat – Ándi jandy daýyspen aıtqan durys. Mundaı pikirdi Májilistiń jalpy otyrysynda palata tóraǵasy Nurlan Nyǵmatýlın bildirdi, dep habarlaıdy QazAqparat tilshisi.
«Menińshe, naǵyz óner ol – aıtys. Aıtysqa fonogrammamen shyǵyp kórińizshi. Onda eshqashan, eshqandaı fonogramma bolmaıdy. Sol úshin shyǵar, halqymyz osy aıtysty jaqsy kóredi. «Qısyq arba jol buzady» dep halqymyz aıtqandaı, óner árqashan da taza bolýy kerek. Ándi jandy daýysta aıtqan durys. Al fonogramma bolsa, onda ony aldyn ala eskertý qajet jáne bılettiń baǵasy da soǵan sáıkes bolýy tıis. Odan keıin halyq ol kontsertke baratynyn ne barmaıtynyn ózi sheshedi. Árıne, kontsert jandy daýysta bolsa ánshige halyqtyń baǵasy da qurmeti de joǵary bolady», - dedi Nurlan Nyǵmatýlın.
Aıta keteıik, jalpy otyrysta QR Mádenıet jáne sport mınıstri Aqtoty Raıymqulova «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» Qazaqstan Respýblıkasy zańy jobasyn tanystyrǵan bolatyn. Qujatta mýzykalyq shyǵarmalardy oryndaýshylardyń fonogrammalardy qoldanýy týraly kórermendi habarlaýy týraly norma kózdelgen.
