«Ańdar shahary 2» mýltfılmi jańa rekord ornatty
ASTANA. KAZINFORM - «Ańdar shahary 2» anımatsııalyq fılmi Gollıvýd tarıhynda buryn-sońdy bolmaǵan, eń joǵary kassalyq tabys jınaǵan anımatsııalyq týyndy atandy.
Variety basylymynyń málimetinshe ( https://variety.com/2026/film/box-office/zootopia-2-highest-grossing-animated-film-box-office-history-1236634289/ ), Djýdı Hops pen Nık Ýaıldtyń shytyrman oqıǵalarynyń jalǵasy 1,7 mlrd dollar tabys ákelgen. Osylaısha, fılm 1,69 mlrd dollar tabys jınaǵan «Oıjumbaq 2» (1,69 mlrd dollar) mýltfılmin basyp ozyp, Gollıvýd stýdııasy shyǵarǵan eń tabysty anımatsııalyq fılmge aınaldy.
Aıta ketetin jaıt, eger Gollıvýdtan tys stýdııalar usynǵan mýltfılmderdi qosa alsaq (jalpyálemdik reıtıng) absolıýtti rekord áli de Qytaı eli shyǵarǵan «Nechja Aıdahar patshasyn jeńedi» mýltfılmine tıesili. Bul anımatsııalyq týyndynyń tabysy 2,25 mıllıard dollardy quraıdy.
Rekordtyq kórsetkishterdiń arqasynda «Ańdar shahary 2» mýltfılmi eń tabysty fılmderdiń jalpy reıtıngisinde óz ornyn oıyp aldy. Qazirgi tańda kartına álemdik prokatta toǵyzynshy orynda tur, Al aldyńǵy qatarda kelesi fılmder tur:
• «Órmekshi adam: Úıge jol joq» - 1,9 mlrd dollar;
• «Kek alýshylar: Sheksizdik soǵysy» - 2 mlrd dollar.
Disney ókilderi bul jetistikke kórermenderdiń yqylasy men qoldaýynyń arqasynda jetkenin aıtty.
«Bul kórsetkish búkil álemdegi kórermenderge tıesili. Olardyń yqylasy men qoldaýy osy jetistikke jol ashty. Biz rejısserler Djared Býsh pen Baıron Hovardty, prodıýser Ivett Merınony jáne Walt Disney Animation Studios ujymyn erekshe maqtan tutamyz. Bul fılm álemniń túkpir-túkpirindegi kórermenniń júreginen oryn tapty. “Ańdar shahary 2” – erekshe jetistik, bul týyndynyń shyǵýyna atsalysqan barsha janǵa alǵysymyz sheksiz», — dedi Disney Entertainment teń tóraǵasy Alan Bergman.
Aıta keterligi, jalpy tabystyń basym bóligi halyqaralyq prokat esebinen jınalǵan. Soltústik Amerıkada mýltfılm 390 mln dollar tapsa, basqa elderde 1,31 mlrd dollar kiris ákeldi.
Qorytyndy tabysta Qytaı naryǵynyń úlesi erekshe boldy. Bul elde fılm 619 mln dollar jınap, Qytaıdaǵy Gollıvýd fılmderi arasynda tarıhtaǵy ekinshi nátıje kórsetti. Budan joǵary kórsetkish tek «Kek alýshylar: Fınal» fılmine (632 mln dollar) tıesili.
Disney kompanııasy ázirge úshinshi bólimniń shyǵar-shyqpasyn resmı túrde jarııalaǵan joq. Dese de, bul týyndydan túsken úlken tabys mýltfılmniń jalǵasyn shyǵarýǵa múmkindik beredi.
Aıta keteıik, Disney kompanııasyna 10 mln dollar aıyppul salyndy.