Anatolıı Hrapatyıdyń atymen Astanadaǵy kóshe jáne týǵan jerindegi mektep atalady
ASTANA. 24 qazan. QazAqparat - Anatolıı Hrapatyıdyń atymen Astanadaǵy kóshe jáne týǵan jerindegi mektep atalady. Bul týraly búgin Astanada aýyr atletıkadan Olımpıada chempıony Anatolıı Hrapatyıdyń jeke qujattarynyń kórmesine arnalǵan sharada málim boldy.
«Biz osy másele boıynsha oblys ákimine jáne elorda ákimine hat jazǵan bolatynbyz. Anatolıı Hrapatyı atyndaǵy kóshe Astanada bolady. Sonymen qatar Atbasardaǵy mektep (Aqmola oblysy) Anatolıı Mıhaılovıchtiń atymen atalatyny belgili boldy»,- dedi Ulttyq muraǵattyń bas dırektory Marat Ábsemetov.
Kórme barysynda sportshynyń 70-ten astam sırek kezdesetin muraǵattyq qujattary qoıyldy. Osy sharaǵa eki dúrkin Olımpıada chempıony Ilıa Ilın de qatysty.
Aıta keteıik, A. Hrapatyı Beıjiń Olımpıadasyna birneshe kún qalǵanda kólik apatynan mert bolǵan edi. Ol bes dúrkin álem chempıony, tórt márte Eýropa chempıony atandy jáne 1988 jyly Seýlde Olımpıada altynyna qol jetkizdi. Al 1996 jyly Atlanta Olımpıadasynda kúmis júldeni jeńip aldy. A. Hrapatyı 4 jyl burynǵy Beıjińdegi dodaǵa aýyr atletıkadan qazaqstandyq qurama komandasynyń jattyqtyrýshysy retinde attanbaq bolǵan.
