Anasynyń qyzylshaǵa qarsy ekpe saldyrmaýy qursaqtaǵy balasyna áser etedi
ASTANA. QazAqparat - QR Bas memlekettik sanıtarlyq dárigeri, Qoǵamdyq densaýlyq saqtaý komıtetiniń tóraǵasy Jandarbek Bekshın 1 jasqa tolmaǵan balalardyń qyzylshamen aýyrýyna qatysty túsinikteme berdi, dep habarlaıdy QazAqparat tilshisi.
Onyń aıtýynsha, qyzylshaǵa qarsy ekpe bala 1 jasqa tolǵanda ǵana egilýi tıis.
«Bir jasqa tolmaı qyzylshamen aýyrǵan sábıler ana qursaǵynda qajetti ımmýnıtetti ala almaǵan. Demek, analary der kezinde ekpe saldyrmaǵan. Árıne, 90-jyldary vaktsınanyń jetispeýshiligi baıqaldy, barlyǵyna jetpedi. Al qazir analardyń salǵyrttyǵynan balalar zardap shegip otyr. Bolashaq analar osyǵan mán berýi kerek», - dedi J. Bekshın Ortalyq kommýnıkatsııalar qyzmetinde ótken baspasóz máslıhatynda.
Sondaı-aq, J. Bekshın ekpe saldyrmaý quqyǵy berilgen Eýropadaǵy jaǵdaıdy erekshe atap ótti.
«Biz úlgi etetin Eýropada qazir 70 myńnan astam jaǵdaı tirkelip otyr. Ekpege qatysty erkindik osyndaı jaǵdaıǵa ákep soqty. Qazir Frantsııada qyzylshaǵa qarsy ekpe mindetteldi. Italııa da osy saıasatty ustanýǵa kóshti. Bizdiń elimizde jyl saıyn 4-4,5 myń adam ekpeden bas tartady. Eski kózqaraspen nemese dinı sebeptermen ekpe saldyrmaıtyndar jıi kezdesedi. Bulaı orta ǵasyrǵa ketip qalýdyń qajeti joq», - dedi bas sanıtarlyq dáriger.
Degenmen, dárigerler júrgizgen túsindirý jumystarynan keıin myńdaǵan turǵyn ekpe saldyrýǵa kelisim bergen.
«Jyl basynan beri 2,5 myń qazaqstandyq óz pikirin ózgertip, ekpe saldyrýǵa kelisim berdi. Bul jumysty jalǵastyra bermekpiz. Ekpeniń qajet ekenin halyqqa durys túsindirý mańyzdy», - dep óz sózin túıindedi Jandarbek Bekshın.
