Anasyn óltirdi dep aıyptalǵan Aqtaý turǵyny 5 jyldan keıin aqtaldy
ASTANA. QazAqparat - Aqtaýda anasyn óltirdi dep aıyptalǵan Dmıtrıı Krýtıhın bes jyldan keıin aqtalyp, sot zalynda bostandyqqa shyqty, dep habarlaıdy «Lada».
6 naýryzda Mańǵystaý oblystyq soty 2013 jyly 1 mamyrda jumys ornynda qaıtys bolǵan anasynyń ólimi týraly iste Dmıtrıı Krýtıhındi kinásiz dep tanydy. Er adam on jyldyń bes jylyn qamaýda ótkizip, sot zalynda bosatyldy.
«Dmıtrıı Krýtıhın adam óltirýdiń dálelderi men sebepteri bolmaýyna baılanysty aqtalyp, zań boıynsha bosatyldy», - dep habarlady sýdıa Sáýle Ómirbolatova.
«Biz osyny uzaq kúttik. Meniń kúıeýimdi aqtap, mán-jaıdy anyqtaǵan sýdıalarǵa rahmet. Biz ótemaqy surap, sotqa shaǵymdanbaımyz, ádildikke qol jetkizip, kinásiz adamnyń bostandyqqa shyqqanynyń ózi jetkilikti», - dedi Dmıtrııdiń jubaıy Aleksandra Krýtıhına.
Eske salaıyq, 2013 jyldyń 1 mamyrynda tazartý ǵımarattarynyń operatory Natalıa T.-ny jumys ornynda óltirip ketken edi. Qylmysker áıelge alty ret pyshaq suǵyp, jelkesinen aýyr zatpen urǵan. Qaza tabýshynyń denesin onyń jubaıy men uly taýyp alǵan. Uly Dmıtrıı Krýtıhın polıtseılerdiń kúdigine iligedi. Ol adam óltirýge qatysy baryn moıyndamaǵan. Polıtseıler zattaı derekterdi (pyshaq salynǵan sómke) tapqannan keıin, kúdikti Krýtıhın kinásin tolyqtaı moıyndaǵan.
2013 jyldyń qazanynda Dmıtrıı Krýtıhın adam óltirgeni úshin 10 jylǵa sottaldy. Bes jyldan keıin isti qaıta tergeýge jibergen.
Foto: lada.kz
