Anasyn aıaýsyz tepkilegen aqmolalyq 4 jylǵa sottaldy
Vedomstvonyń málimetinshe, Kókshetaý qalalyq sotynda «anasynyń densaýlyǵyna aýyr zııan keltirdi» degen aıyppen jumys istemeıtin, buryn sottylyǵy bar er adamǵa qatysty qysqartylǵan tártippen (Qylmystyq kodekstiń 106-babynyń 1-bóligi boıynsha) qylmystyq is qaraldy.
Sotta belgili bolǵandaı, 66 jastaǵy áıel úıinde qulap, jambas súıegi synǵan. Ony óziniń uly mas kúıinde uryp-soqqan. Mas bolyp úıine kelgen ol aýyryńqyrap jatqan anasynan turýdy talap etip, oǵan aıqaılaǵan. Tósekten edenge ıterip, keýdesinen jáne ishinen tepken. Munan soń uıyqtap qalǵan uly birneshe saǵattan keıin oıanyp, anasynyń yńyrsyǵanyn estip, jedel járdem shaqyrǵan.
«Zardap shegýshi jambas súıeginiń jabyq synýy dıagnozymen aýrýhanaǵa jatqyzyldy, keýde jaraqaty, alty qabyrǵanyń synýy, keýde gematomasy, jambas súıeginiń synýy, ishtiń jaraqaty, kókbaýyrdyń jarylýy, ish qýysynda qannyń jınalýy anyqtaldy. Sotta er adam kinásin moıyndap, ókindi. Jábirlenýshi anasy ony keshirdi, ulyna eshqandaı talap qoımady, ony bas bostandyǵynan aıyrmaýdy ótinip surady», - dedi vedomstvodan.
Jaza taǵaıyndaýda sot sottalýshynyń qylmystyq jaýaptylyǵy men jazasyn jeńildetetin mán-jaılardy – áreketine ókingenin, sondaı-aq aýyrlatatyn mán-jaılardy - mas kúıinde qylmys jasaǵanyn eskerdi.
«Sot úkimimen er adamǵa 4 jylǵa bas bostandyǵynan aıyrý jazasy taǵaıyndaldy jáne 575 398 teńge somasynda (jábirlenýshini emdeýge shyǵyndar) materıaldyq zalal óndirildi. Sonymen qatar, bas bostandyǵynan aıyrýdy óteý orny boıynsha alkogolızmnen emdeý boıynsha medıtsınalyq sıpattaǵy májbúrleý sharalary taǵaıyndaldy. Bas bostandyǵynan aıyrý jazasy er adamǵa is-árekettiń qoǵamdyq qaýiptiliginiń joǵarylaýyna baılanysty taǵaıyndalady», - dep tolyqtyrdy vedomstvodan.
Sot úkimi zańdy kúshine engen joq.
Aıta ketsek, budan buryn Aqmola oblysynda memleket múlkin jymqyrǵan burynǵy bólim bastyǵy 5 jylǵa sottalǵanyn jazǵan edik.
