Anasyn 3 balasymen qaǵyp ketken júrgizýshige qatysty is qozǵaldy
ALMATY. QazAqparat - Almaty polıtsııasy úsh balasy men anasy japa shekken jol apatyna qatysty túsinikteme berdi, dep habarlaıdy QazAqparat tilshisi qalalyq ІІD baspasóz qyzmetine silteme jasap.
Eske sala keteıik, Almatyda djıp jol shetindegi úsh bala men áıeldi qaǵyp ketkendigi týraly buǵan deıin habarlaǵan bolatynbyz.
Qazirgi tańda atalǵan derek boıynsha sotqa deıingi tekserý jumystary júrip jatyr.
«33 jastaǵy «Toıota Haılander» júrgizýshisi Baıtursynov kóshesimen kele jatyp, BMV kóligine jol bermeı ótip ketpek bolǵan. Sonyń kesirinen kólikter soǵylyp, Toıota kóligi ınertsııamen jol shetindegi beton qorshaýǵa soǵylyp toqtady. Kóliktiń artqy bóligi jol shetindegi áıel men onyń úsh balasyn qorshaýǵa soǵady. Aıta ketý kerek, bul derek QR QK 345-babynyń 1-bólimimen sotqa deıingi biryńǵaı tergeý isi tizilimine tirkeldi», - dedi Almaty ІІD anyqtaý bólimi basshysynyń orynbasary Oljas Sháripov.
Qalalyq Densaýlyq saqtaý basqarmasy habarlaǵandaı, 6 jastaǵy bala qazir ál ústinde jatyr. 3 jáne 8 jastaǵy balalar neırohırýrgııa bóliminde jatyr. Olardyń jaǵdaıyn dárigerler orta deńgeıde dep baǵalap otyr.
33 jastaǵy áıel de bas jaraqatymen Shuǵyl kómek kórsetý aýrýhanasynyń neırohırýrgııa bóliminde jatyr.
