Anasy perzenthanada kóz jumǵan shaqalaqtyń jaǵdaıy aýyr
ASTANA. QazAqparat - Astana qalasynyń qoǵamdyq densaýlyq saqtaý basqarmasynda elordadaǵy №1 perınataldyq ortalyqta maýsym aıynda kóz jumǵan ananyń balasynyń jaǵdaıy týraly aıtyldy, dep habarlaıdy QazAqparat tilshisi.
«Qyz bala. 2018 jyldyń 20 maýsymynda dúnıege kelgen. Salmaǵy - 4500 gramm. Ottegilik ashyǵýdyń saldarynan týǵaly beri balanyń densaýlyǵy asa aýyr kúıde qalyp otyr. Bala jasandy ókpe jeldetkishte 7 táýlik boıy jatty. Qazir ózdiginen dem alýda. Ylǵaldy ottegiden qaıta-qaıta ıngalıatsııa alyp jatyr. Balanyń jaı-kúıinde ońalý dınamıkasy baıqalǵanymen, nevrologııalyq sımptomatıkaǵa baılanysty aýyr kúıde. Ózdigimen dem alady», - dep habarlaıdy baspasóz qyzmeti QazAqparat tilshisine.
12 shilde kúngi aqparat boıynsha, bala jansaqtaý bóliminen jańa týǵan balalardy kútý bólimine aýystyrylǵan. Balanyń kútimine týǵan-týystary erekshe kóńil bólip otyr.
Balany búginge deıin Ana men bala ulttyq ǵylymı ortalyǵynyń, Balalardy ońaltý ortalyǵynyń mamandary, Astana qalasy qoǵamdyq densaýlyq saqtaý basqarmasynyń bas mamandary teksergen. Balanyń jaı-kúıi Astana qalasy qoǵamdyq densaýlyq saqtaý basqarmasy men Densaýlyq saqtaý mınıstrliginiń baqylaýynda.
«Dárigerlermen, nevrologtarmen jáne reabılıtologtarmen birlesip, ońaltý sharalary júzege asyrylyp jatyr. Búgingi kúni balanyń densaýlyǵy birqalypty», - delingen habarlamada.
Eske sala ketsek, Astanada №1 perınataldyq ortalyqta bosanǵan eki áıel qaıtys bolǵany týraly buǵan deıin habarlanǵan bolatyn.
Dárigerlerdiń aıtýynsha, 34 jastaǵy bosanǵan birinshi áıel 21 maýsymda tańǵy saǵat 5-te, al ekinshisi (31 jasta) 25 maýsymda saǵat 04-00-der kezinde kóz jumǵan.
«Birinshi jaǵdaıda kelinshek balany ózi bosandy, al ekinshi jaǵdaıda kesar tiligi jasaldy. Ekeýi de osyǵan deıin bosanǵan áıelder. Sonymen qatar olardyń júktilikke baılanysty emes aýrýlary bolǵan», - dedi Sáýle Muqysheva.
