Anasy ólimshi etip sabaǵan jetkinshek balalar úıine ornalastyryldy
ShYMKENT. QazAqparat - Ońtústik Qazaqstan oblysynda anasy ólimshi etip sabaǵan Asyl Battalǵazıev balalar úıine ornalastyryldy. Jastaıynan taǵdyr taýqymetin tartyp kele jatqan jetkinshek keshe Shymkenttegi №3 balalar úıinde jetkizildi. Bul týraly Ordabasy aýdandyq bilim bóliminiń mamandary málimdedi, dep habarlaıdy QazAqparat HAA tilshisi.
«Asyl sońǵy eki apta kóleminde Ordabasy aýdandyq aýrýhanasynda em qabyldady. Al, keshe biz balany Shymkenttegi balalar úıine aparyp ornalastyrdyq. Sebebi, buǵan deıin jetkinshektiń máelesin jan-jaqty qaraǵan arnaıy komıssııa onyń balalar úıinde bolǵany durys degen qortyndyǵa keldi. Osy qortyndyǵa sáıkes, aýdan ákiminiń qaýlysy shyqty. Ol qaýlynyń negizinde Oblystyq bilim basqarmasy balalar úıine ornalastyrýǵa joldama bergen bolatyn. Asyldyń qazir jaǵdaıy jaqsy», - dedi Ordabasy aýdandyq bilim bóliminiń ádiskeri Baqbergen Sársenbekov.
Jalpy, Asyldy aýrýhanadan shyqqan soń úıinde 20 kún boıy qaraǵan ádisker Erkinaı Jamalova da bul sheshimniń durys qabyldanǵanyn aıtady. Sebebi anasynyń jyldar boıy jábir kórsetýi men durys qaramaýy, uryp soǵýy balaǵa psıhologııalyq salmaq túsirgen. Saldarynan jetkinshek durys sóıleı almaıdy, aıaq-qoly dirildep ketetin bolypty. Ádiskerdiń sózinshe, oǵan biraz ýaqyt kóńil bólinip, tıisti emdik sharalar jasalsa, jazylyp ketýi ábden múmkin.
«Asyl meniń úıimde bolǵan 20 kún ishinde jaqsy sóılep, óz-ózine kelip qaldy. Ol óte sezimtal ekenin baıqatty. Ózine kóbirek meıirim bólse, ózimen kóp sóılesse eken dep otyrady. Jyly-jyly sózder estigisi keledi. Túnde qushaqtap jatyp, erkelegendi unatady. Analyq meıirimge zárý. Este saqtaý qabileti de jaqsaryp qaldy, jattaýlardy tez jattap alady. Biraq tili onsha damymaı qalǵan, sondyqtan onymen kóp jumys isteý kerek. Bir aıaǵyn syltyp basady, qolyna da massaj qajet. Eger Asylǵa osynyń bári der kezinde jasalsa, ol aıyǵyp ketýi ábden múmkin», - deıdi Erkinaı Jamalova.
Sala mamandarynyń aıtýynsha balany asyrap alǵysy nemese patronattyq tárbıege alatyndar bolsa ruqsat beriledi. Alaıda bir jyldaı ýaqyt kútýi kerek. Óıtkeni bir jyl kóleminde Asyldyń aıaǵyna massaj jasalyp, til múkistigin túzeý úshin logopedter jumys isteıdi eken. Qazir balalar úıiniń mamandary Asyldy mektepke jiberýge daıyndaýda. Eger bilim alýda qıyndyqtar týyp jatsa, onda basqa amaldardy qarastyramyz dep otyr.
Eske salaıyq, Asyl Battalǵazıevti anasy ólimshi etip sabaǵan soń, ol aýyr halde aýrýhanaǵa jetkizilgen bolatyn. Dárigerler balanyń basynan, denesinen kóp aýyr soqqylar alyp, ystyq sýmen kúıdirilgenin aıtqan. Osyndaı keıin balanyń anasy tabylyp, onyń ústinen qylmystyq is qozǵalǵan bolatyn. Ol jaýap berý kezinde balasynan qutylǵysy kelgenin, sol úshin osyndaı áreketke barǵanyn jetkizgen. Tipti jeńil júristi áıel perzentinen bas tartatynyn aıtyp, til hat jazyp ta bergen. Oǵan qatysty tergeý jumystary áli jalǵasyp jatyr. Asyldan bólek onyń asyraýynda kishkentaı qyzy bar. Bazbireýler ony taǵy da aıaǵy aýyr ekenin aıtady.
