Anasy men qyzyn tonaǵan kúdiktini ustaýǵa kómektesken aqtóbelik marapattaldy
AQTÓBE. QazAqparat – Aqtóbe oblystyq polıtsııa departamentiniń bastyǵy Atyǵaı Arystanov eki áıeldi tonaǵan kúdiktini ustaýǵa kómektesken qala turǵynyn marapattady, dep habarlaıdy QazAqparat tilshisi.
Kúdikti nebári 10 mınýt ishinde eki áıeldi tonap úlgergen. Búgin oblystyq polıtsııa departamentiniń bastyǵy Atyǵaı Arystanov kúdiktini ustap alǵan Nursultan Sıtınovqa alǵys hat berdi.
«Tańerteń jumysqa barý úshin kólikti qyzdyrýǵa esik aldyna shyqtym. Sol kezde kómekke shaqyrǵan áıeldiń daýysyn estidim. Barsam, oqýshynyń sómkesi shashylyp qalǵan, oqý quraldary jerde jatyr. Áıel kúdiktiniń baǵyt alǵan jaǵyna siltep jiberdi. Men kólikpen qýyp jettim. Mas kúıinde eken. Qýysqa kirip ketken adamdy 10 mınýt kútip turdym. Shyqpaǵan soń qaıta aınalyp, áıelge bardym. Ony úıine jetkizip tastap, polıtsııa shaqyrdym», - dedi Nursultan Sıtınov.
Oqıǵa 19 qarasha kúni tańǵy saǵat 7:20-da bolǵan. Kúdikti aldymen bir áıeldi tonap, onyń sómkesindegi ámııany men telefonyn qoldy etken. Keıin araǵa 10 mınýt salyp, anasy men qyzyn qorqytqan. Sol jerde balabaqshaǵa bara jatqan balasynyń kıim salǵan sómkesin alyp ketti.
«Er azamatymyz polıtsııaǵa kómek kórsetti. Kúdikti ıAsnyı aýyly turǵynynyń aqshasy men telefonyn ashyq tonap ketken. Keıin taǵy bir turǵynnyń kıim salǵan sómkesine jarmasqan. Kúdikti ustaldy, qamaldy. Qylmystyq kodekstiń «Tonaý» baby boıynsha sotqa deıingi tergeý bastaldy», - dedi oblystyq polıtsııa departamentiniń bastyǵy Atyǵaı Arystanov.
Aıta keteıik, oblysta polıtsııanyń 3 myńnan astam qoǵamdyq kómekshi bar. Olar 14 qylmysty ashyp, 500-den astam ákimshilik quqyq buzýshylyq anyqtaǵan.
