Anasy men áıelin óltirgen kúdiktiniń ákesi oqıǵanyń qalaı bolǵanyn aıtty

Shubarsý aýyly turǵynynyń sózinshe,  28 jastaǵy uly Jandarbek buryn qylmys jasamaǵan. Jaman ortaǵa da qosylmaǵan. Biraq sońǵy kezderi minez-qulqynda ózgeris paıda bolǵany baıqalǵan.

«Onyń bir dinı topqa qosylǵanyn baıqaǵam joq, jeke ózi júretin. Buryn esirtkige uqsas temeki tartqan. Sony tartqaly beri kóshege shyǵa almaı, qarańǵydan qorqatyn bolyp qalyp edi. Tipti dúkenge de bara almaıtyn boldy.  Men sol temekiden keıin qorqaq bolyp qalǵan aý dep oılaımyn negizi. Tamaǵyna tábetin qysyp tastasa kerek, tamaq ta jemeı qoıdy. Tórt-bes ret namaz oqyp alady da, kóp uıyqtaı berdi»,-deıdi Ábdi Qojyqov.

Qandy oqıǵa bolǵan kúni Jandarbek ersi qylyq baıqatpaǵan. Biraq óńi ózgerip, birtúrli bolyp kóringen. Januıada urys-keris te bolmapty. Oqıǵa aıaq astynan órbigen.

«Sol kúni áıelimen de janjaldasqan joq. Kóz aldymda otyrdy. Biraq tamaq jemedi. Maǵan kelinim dárihanadan dári alý kerek edi degen soń men ony sonda jiberdim. Balam onyń izinshe shyǵyp ketti. Men Jandarbekti úıdi jylytýǵa otynǵa jumsaǵan edim. Biraq qolyna dastarhanda maı kesip otyrǵan pyshaqty alyp shyqqanyn baıqamappyn. Sóıtip qora jaqta áıelin pyshaqtaǵan. Ol aıqalaǵan ǵoı. Sol kezde áıelim úıden atyp shyqqan. Shyǵa salyp, balasynan qashqan. Óıtkeni balanyń kózi qyzaryp ketken, teńselip, esin bilmeı júrgen. Ony da pyshaqtaǵan. Sodan maǵan qaraı júgirdi. «Papa siz de ólesiz, men de ólemin», dedi. Sol kezde men onyń qolyn qaıyryp, pyshaǵyn aldym. Jerge qulattym. Sóıtip aıǵaılap edim, kórshimniń balasy keldi. Qolyn baılap tastadym. Meniń qartaıǵan ákem bar, sony dárigerler adam bolmaıdy degen soń aýrýhanadan shyǵaryp alǵanbyz kúni keshe. Sol kisini kútip júrsek, bas-aıaǵy 5 mınýttyń ishinde meniń búkil otbasym ketip qaldy ǵoı. Janjal bolǵan joq, basqa bolǵan joq. Men sodan esimdi jınaı almaı otyrmyn. Men jalǵyz qaldym»,- deıdi kúdiktiniń ákesi.

Ábdi Qojyqov qazir úıinde jalǵyz ózi qalǵanyn aıtady. Alty aılyq nemeresin naǵashylary alyp ketipti.  

«Nemeremdi qudalarym kelip alyp ketti. Ol kisilerdiń túsinigi bar jandar bolyp shyqty. Qudam maǵan «Sizge taǵar aıybymyz joq, qudalyǵymyz myń jyldyq» dep qol alysty. Olarǵa ómirbaqı rızamyn. Úılerinde emizýli balasy bar kelinderi bar eken, nemeremdi sol kelinge ekinshi perzenti etip qostyq. Egizi boldy. Qazir qujattaryn rásimdetip jatyrmyn, solarǵa tapsyrýǵa. Olarǵa nemeremdi óz erkimmen berdim. Eki ortada oınap shaýyp júre beredi ǵoı degen úmitpen»,-deıdi qaıǵydan qan jutqan áke.

Qazir tártip saqshylary oqıǵa ornyn tekserip, kúdiktiniń ákesinen jaýap alyp ketken. Tipti marqum bolǵan eki áıeldiń uıaly telefondary da polıtsııaǵa tapsyrylǵan . Al, Ábdi Qojyqov bolsa bútin bir otbasynyń qaıǵyǵa ushyraǵanyna jaýaptylar jazasyn alsa deıdi.

«Meniń bir ul, bir qyzym bar. Biraq balam jalǵyz bolsa da  anasyn óltirgeni úshin júz jyl jaza berse de rızamyn. Men áıelimdi, kelinimdi qaıtara almaıtynymdy túsinemin. Biraq onyń mundaı áreketke barǵanyna ne sebep, men sonyń anyq-qanyǵyn bilgim keledi. Buǵan deıin de osyndaı jaǵdaı bolǵan. Bul balamnyń áreketinde esirtkige qatysty bir másele bar sııaqty. Óıtkeni osyndaı nárseler bolyp jatyr bizdiń Shubarsý aýylynda. Buǵan deıin bir jigit óziniń balasyn pyshaqtaǵan bolatyn. Men sony bilgim keledi. Bul nárseniń basqa úılerde qaıtalanǵanyn qalamaımyn. Qazirgi meniń basymdaǵy jaǵdaıdy jaýyma da tilemeımin. Men sol balalardyń esin ketirgen zatty kim ákelip jatyr, sonyń anyq-qanyǵyna jetý kerek dep aıtar edim. Osy nársege kináli adamdar jazasyn alsa eken»,- deıdi Ábdi Qojyqov.

Eske salaıyq, 23 aqpan kúni Ordabasy aýdanyna qarasty Shubarsý aýylynda 28 jastaǵy jigit áıeli men anasyn pyshaqtap óltirgen bolatyn. Qazir sot sanktsııasymen qamaýǵa alynǵan  kúdiktiniń 1990 jyly Ózbekstanda týǵany anyqtaldy. Atalǵan jaıt negizinde Qylmystyq kodekstiń 99 baby «Adam óltirý» boıynsha is qozǵalyp, sotqa deıingi tergeý amaldary júrgizilýde. Birneshe saraptamalar taǵaıyndalyp otyr.