Anasy men ákesi uldaryn qorqytamyz dep óltirip aldy - QR ІІM
ASTANA. 3 sáýir. QazAqparat - Shyǵys Qazaqstan oblysy Semeı qalasynda krımınaldyq polıtsııa qyzmetkerleri tapsyrys boıynsha adam óltirdi degen kúdikpen eki jergilikti turǵyndy quryqtady.
Bul týraly búgin brıfıngte QR Іshki ister mınıstrliginiń resmı ókili Nurdildá Oraz málim etti.
Onyń aıtýynsha, 21 naýryz kúni sharýa qojalyǵynyń malshysy qaladan 10 shaqyrym jerdegi alańqaıdan 29 jastaǵy er adamnyń máıitin tabady. Sot-medıtsınalyq saraptamasy kórsetkendeı, onyń ólimi mı bas súıeginiń jabyq jaraqaty saldarynan bolǵan. Atalǵan fakti boıynsha Semeı qalalyq Іshki ister basqarmasy qylmystyq is qozǵady.
«Tergeý amaldary barysynda qylmystyq iske tapsyrys berýshiler - jábirlenýshiniń anasy men ógeı ákesi ekendigi anyqtalyp otyr. Olar ózderiniń tanystaryna 200 myń teńge usynyp, maskúnemdikke salynyp, úı ishinde únemi urys-keris shyǵaratyn ulyn qorqytýdy suraǵan.Tapsyrysty oryndaýshylar jábirlenýshini qala syrtyna alyp shyǵyp, qatty uryp-soǵyp, óltirip alady. Belgili bolǵandaı, qylmysty júzege asyrýshylardyń ekeýi de budan buryn da qylmystyq jaýapkershilikke tartylǵan»,- dedi resmı ókil.
Qylmysty júzege asyrýshylar da, tapsyrys berýshiler de qylmysqa qatysy bar ekendikterin tolyq moıyndady. Qazirgi tańda atalǵan azamattar ýaqytsha qamaý ızolıatoryna qamaldy. Tergeý jumystary júrgizilýde.
