Anasy qulyptap ketken: Elorda polıtseıleri balalardy qaıǵyly jaǵdaıdan qutqardy
NUR-SULTAN. QazAqparat – Elordalyq polıtseıler besinshi qabattyń ashyq terezesinen anasyn shaqyryp jylaǵan balany qutqardy, dep habarlaıdy QazAqparat qalalyq Polıtsııa departamentiniń baspasóz qyzmetine silteme jasap.
Polıtsııanyń «102» arnasyna saǵat 21:00-de A. Imanov kóshesindegi úıdiń besinshi qabatyndaǵy ashyq terezeden balanyń qatty jylap, anasyn shaqyrǵany týraly aqparat kelip tústi. Oqıǵa ornyna ákimshilik ýchaskeniń polıtsııa ınspektorlary jedel jetti.
«Atalǵan fakt rastaldy. Balanyń jarty denesi terezeden jartylaı shyǵyp turǵan. Ýchaskelik ınspektor polıtsııa kapıtany Serik Keńesov jedel túrde besinshi qabatqa kóterilip, esikti daýystap qaǵa bastady, al onyń seriktesi polıtsııa kapıtany Jomart Sársembaev jaǵdaıdy tómennen baqylap otyrdy. Kishkentaı qyz esiktiń qońyraýyn estip, terezeden túsken. Esik jabyq bolǵandyqtan, polıtsııa qyzmetkeri qyzben sóılesip, oıyn oınaýǵa tartty. Polıtseı kishkentaı qyzǵa esiktiń neshe ret qaǵylǵanyn tapsa, kóptegen táttiler áperýge ýáde bergen. Bul ýaqytta qutqarýshylar páterge shatyr arqyly kirip, qyzdy qutqardy», - dep jazdy departament.
Balanyń qaýipsizdigine kóz jetkizgen soń polıtseıler anasyn birge kútýdi uıǵardy. Bir jarym saǵattan keıin sábıdiń anasy kelgen.
Keıin anyqtalǵandaı, qyzdyń anasy eki jáne tórt jastaǵy balalardy syrtynan qulyptap, óz sharýasymen ketip qalǵan. Polıtseıler áıelge jas balalardy qaraýsyz qaldyrmaý kerektigin túsindirdi.
«Al Serik Keńesov balaqaıǵa ýáde etkenindeı, bir paket tátti satyp áperdi. Baqytymyzǵa oraı, tapqyr polıtseıler qaıǵyly oqıǵanyń aldyn aldy. Polıtseıdiń ózi de bala úshin qatty ýaıymdaǵanyn aıtty, óıtkeni ózi de tórt balany tárbıelep otyr», - delingen habarlamada.
