Anasy dinı nanym-senimine baılanysty qan quıǵyzbaǵan búldirshin qyz kóz jumdy
«Alaıda, Vıktorııanyń qandaı jaǵdaıda qaza tapqanyn búldirshin qyz hımıoterapııanyń birneshe kýrsyn alǵan Ulttyq ana men bala ǵylymı ortalyǵynyń dárigerleri de, tipti ákesi de bilmeı otyr. Anyǵy Natalıa Sýsaeva qyzyn Úndistanǵa alyp ketip, qyz sol jaqta kóz jumǵan. Búldirshinniń múrdesi krematsııalanyp, kúli osy dúısenbi kúni Qostanaıda jer qoınyna tapsyrylǵan», - delingen Dinı máseleler jónindegi aqparattyq-konsýltatsııalyq ortalyq taratqan aqparatta.
Buǵan deıin qyzdyń anasy Natalıa Sýsaevanyń Iegova kýágerleri dinı uıymynyń múshesi ekendigi, dinı nanym-senimine baılanysty qyzyna qan quıǵyzýdan bas tartqandyǵy habarlanǵan bolatyn. Ortalyq málimetinshe, Ulttyq ana men bala ǵylymı ortalyǵy onkologııa bólimshesiniń meńgerýshisi Arman Ábenov anasynyń qandaı nıetpen ota jasatýdan bas tartqandyǵyn bilmeıtindigin aıtqan jáne dárigerler qyzdy Úndistanǵa emdeýge alyp ketkendigin bilmegen.
Mamyr aıynda kishkentaı qyzdy operatsııaǵa daıyndap, sol úshin dárigerlerdiń arnaıy konsılıýmy da ótken. Biraq, operatsııa aldyndaǵy túnde anasy dárigerlerge aıtpastan qyzynyń jaǵdaıynyń aýyrlyǵyna, isik kóleminiń ulǵaıyp ketkendigine qaramastan ketip qalǵan. Buǵan qosa, dárigerler dinı uıym músheleri tarapynan medıtsına qyzmetkerlerine qysym bolǵandyǵyn da aıtýda. «Iegova kýágerleri hrıstıan qaýymy» jergilikti ókildiginiń músheleri qandy almastyratyn komponentterdi paıdalaný qajettigin aıtyp, tabandap turyp alǵan.
Qyzdyń ákesi Maksım Sýsaevtyń aıtýynsha, Vıktorııanyń ómirden ozǵandyǵyn eskertpegen jáne jerleý sharasyna shaqyrmaǵan. Osyǵan baılanysty ol burynǵy áıelin sotqa bermek nıette. Ol burynǵy áıeliniń balanyń jaǵdaıy óte aýyr ári ólip ketýi múmkin ekendigin bile tura, aýrýhanadan alyp ketti dep sanaıdy.
Polıtsııa Natalıa Sýsaevanyń ústinen QR Qylmystyq kodeksiniń 119-baby boıynsha qylmys qozǵaýy da múmkin. Atalǵan bapqa sáıkes, kináli kisiniń ol adamǵa kómek kórsetý múmkindigi bolǵan jáne ol adamǵa qamqorlyq jasaýǵa mindetti bolǵan ne ony ómirine nemese densaýlyǵyna qaýipti kúıde qaldyrǵan jaǵdaıda elý aılyq eseptik kórsetkishten júz aılyq eseptik kórsetkish mólsherinde aıyppul salýǵa, ne júz jıyrma saǵattan júz seksen saǵatqa deıin merzimge qoǵamdyq jumystarǵa tartýǵa, ne bir jylǵa deıingi merzimge túzeý jumystaryna, ne bir jylǵa deıingi merzimge bas bostandyǵyn shekteýge jazalanady.
Zertteý ortalyqtary qaýymdastyǵynyń dırektory ıÝlııa Denısenkonyń aıtýynsha, «Iegova kýágerleri» Qazaqstan aýmaǵynda resmı tirkelgen dinı uıym sanalady.
Aıta keterligi, bul dinı-nanym senimge baılanysty balanyń ólimine jol berilgen birinshi oqıǵa emes. Osyǵan deıin Shymkentte 9 aılyq bala aýrýhanada mert bolǵan edi. Óıtkeni, «Iegova kýágerleri» dinı uıymynyń músheleri bolǵan ata-analary sábıge qan quıýǵa ruqsat bermeı qoıǵan bolatyn.
Aıta keterligi, keshe Úkimet úıinde ótken brıfıngte Din isteri jáne azamattyq qoǵam mınıstri Nurlan Ermekbaev «Iegova kýágerleri» dinı uıymynyń Almatydaǵy jumysynyń toqtatylýy men anasynyń qyzy Vıktorııa Sýsaevaǵa qan quıýyna qarsy bolýyna qatysty pikir bildirgen bolatyn.
«Bizdiń zańnamamyzǵa sáıkes Qazaqstan tirkelgen barlyq dinı birlestikter teń quqyly ári zań aldynda birdeı. «Iegova kýágerleri» dinı birlestigi Qazaqstanda resmı tirkelgen dinı birlestik sanalady. Sondyqtan ol zańnamaǵa sáıkes jumys isteıdi. Bizdiń ustanymymyz boıynsha, bul uıym ekstremıstik emes jáne búgingi kúni ony tolyqtaı jabý nemese oǵan Qazaqstanda qandaı da bir qysym jasaý jospary joq. Jalǵyz ǵana talap - zańnamany saqtaý. Almatydaǵy jaıtqa qatysty aıtar bolsam, sot sheshimimen «Iegova kýágerleri» dinı birlestiginiń jumysy toqtatyldy. Jabylǵan joq, úsh aıǵa toqtatyldy. Bul barynsha jeńil formasy. Ǵıbadat mekemelerinde terrorızmge qarsy qorǵanys erejesi saqtalmaǵan. Terrorızmge qarsy qorǵanys erejesin quqyq qorǵaý jáne kúshtik organdardyń arnaıy komıssııasy tekseredi. Olar bul erejelerdiń saqtalmaǵandyǵyn anyqtady. Uıǵarym engizildi. Alaıda, bul eskertýler merziminde joıylǵan joq. Sondyqtan materıaldar sotqa berildi jáne sot dinı birlestik qyzmetin úsh aıǵa toqtatý týraly sheshim qabyldady», - degen bolatyn.
Onyń aıtýynsha, eger bul eskertýler joıylatyn bolsa, onda dinı uıym óz qyzmetin jalǵastyra alady.
