Anastasııa Ýsoltseva «Óskemen arýy - 2016»
ASTANA. QazAqparat - «Óskemen arýy - 2016» baıqaýy máresine jetti. Jeńimpaz tájin 19 jastaǵy Anastasııa Ýsoltseva ıelendi, ol endi elimizdiń arýy ataný úshin basty baıqaýda baǵyn synap kóredi, dep habarlaıdy YK-news.kz.
«Óskemen arýy - 2016» baıqaýyna 12 boıjetken saıysty. Shara arýlardy tanystyrýdan bastaldy. Budan soń boıjetkender ózderi jasaǵan kóılekterimen sahnaǵa shyqty. Bul kezeńniń basty ereksheligi - kıimdi qyzdar matadan basqa kez kelgen materıaldan jasaý tıis bolatyn. Qatysýshylar kostıýmderin karton, polıetılen paket jáne qaǵazdan jasady.
Aqtyq synnyń aldynda arýlar kópshilik aldyna qazaqsha kóılek kıip shyqty.
Іs-shara sahnanyń sońǵy kezeńinde olar erekshe keshki kóılektermen defıle ótkizdi.
Nátıjesinde saıystyń «Óskemen vıtse arýy - 2016» birinshi ataǵyn Aı-dana Mamýthanova aldy, ekinshi orynda «Óskemen vıtse arýy - 2016» Jannur Ramazanova. Baıqaý jeńimpazy jáne «Óskemen arýy - 2016» ataǵy 19 jastaǵy stýdent Anastasııa Ýsoltsevaǵa buıyrdy. Ol endi jeltoqsan aıynda ótkiziletin «Qazaqstan arýy - 2016» respýblıkalyq baıqaýyna oblys atynan qatysady.
