Anastasııa Orazbaeva: Ońtústik Koreıany salqynqandylyqtyń arqasynda jeńdik

ASTANA. KAZINFORM – Shaıbaly hokkeıden Qazaqstan áıelder quramasy Ońtústik Koreıaǵa qarsy qıyn match ótkizdi. Alaıda overtaımda qarsylastaryn jeńip, 2025 jylǵy Azııa oıyndarynyń pleı-off kezeńine birinshi orynmen shyqty. Bul týraly Ulttyq Olımpıadalyq komıtet málim etti.

Komanda kapıtany Anastasııa Orazbaeva jeńiske salqynqandylyqtyń arqasynda qol jetkizgenderin atap ótti.

– Oıyn biraz qıyn boldy. Bapkerdiń tapsyrmasyn durys oryndaı almadyq. Biraq jeńis bizde qaldy. Bálkim, qarsylasty salqynqandylyqtyń arqasynda jeńgen shyǵarmyz. Olardyń jibergen qateligi bizge jeńis ákeldi. Bul – júlde úshin kúrestegi jaqsy qadam. Bizdiń maqsat – medalǵa qol jetkizý. Basqa jol joq. Qarsylastarmen buǵan deıin Azııa chempıonatynda kezdeskenbiz. Barymyzdy salamyz, – dep qorytyndylady hokkeıshi.

Aıta keteıik, Hokkeıden Qazaqstan qyzdar quramasy Qytaıdyń Harbın qalasynda ótip jatqan ІH qysqy Azııa oıyndarynda tórtinshi jeńisine qol jetkizdi.

Taraptar úsh kezeńniń qortyndysynda jeńimpazdy anyqtaı almady. Alaıda, Aleksandra Shegaı qosymsha ýaqytta qarsylas qaqpasynan sańlaý taýyp, jeńis golyn soqty.

Osylaısha, qazaqstandyq hokkeıshy qyzdar V tobyndaǵy barlyq oıynda jeńiske jetip, pleı-offqa joldama aldy. Endi olar A tobynyń úzdikteri Qytaı jáne Japonııamen kezdesedi.