Anastasııa Gorodko frıstaıl-mogýldan úsh dúrkin álem chempıony atandy
ASTANA. KAZINFORM – Qazaqstandyq Anastasııa Gorodko frıstaıl-mogýldan Almatyda ótip jatqan jasóspirimder arasyndaǵy álem chempıonatynda altyn medal jeńip aldy, dep habarlaıdy Ulttyq olımpıadalyq komıtet.
Ol paralleldi mogýlda úzdik atandy. Aqtyq synda Gorodko amerıkalyq Rız Chapdelaındi jeńdi.
Qola júldege Ebbı Maklarnon (AQSh) ıe boldy.
Buǵan qosa, bir kún buryn Anastasııa jekeleı jarysta kúmis medal jeńip alǵan edi.
Aıta keteıik, 2022 jylǵy álem chempıonatynda Gorodko úsh júlde ıelendi: paralleldi mogýlda jeńiske jetip, jekeleı esepte jáne aralas komandalyq synda ekinshi oryn aldy. Sondaı-aq, 2024 jylǵy álem chempıonatynda ol mogýl boıynsha birinshi, al paralleldi mogýlda ekinshi oryn alǵan edi.
Qazaqstan frıstaıl-mogýldan álem chempıonatynyń alǵashqy medalin jeńip alǵanyn jazǵan bolatynbyz.