Anastasııa Galeevany óltirgender 15 jáne 6 jylǵa sottalýy múmkin
ALMATY. QazAqparat – Almaty oblysynda 22 jastaǵy boıjetken Anastasııa Galeevanyń ólimine kúdiktilerdiń qandaı jazaǵa tartylýy múmkin ekendigi aıtyldy, dep habarlaıdy QazAqparat tilshisi.
Sot aldynda 27 jastaǵy Evgenıı Stepanov pen 25 jastaǵy Ashat Barjaqsın jaýap berip jatyr.
Іle aýdanynyń turǵyny E.Stepanov buryn kólik urlaǵany úshin 1,5 jyl jazasyn ótep shyqqan. Oǵan adam óltirdi degen aıyp taǵylyp otyr. Al qylmysty jasyrǵany úshin aıyptalǵan A.Barjaqsın buryn sottalmaǵan.
Memlekettik aıyptaýshy jaryssóz kezinde olardy 15 jáne 6 jylǵa bas bostandyqtarynan aıyrýdy surady.
«Evgenıı Stepanovty QR QK 99-babynyń 1-bólimi boıynsha aıypty dep taýyp, 15 jylǵa bas bostandyǵynan aıyrýdy suraımyn. Al Ashat Barjaqsın QR QK 432-baby boıynsha aıypty dep taýyp, 6 jylǵa bas bostandyǵynan aıyrýdy suraımyn», - dedi prokýror Marat Qasymov.
Memlekettik aıyptaýshy olardy bultartpaý sharasyn ózgerissiz qaldyrýdy surady.
E.Stepanov ókinishin bildirgenmen adam óltirgenin moıyndamady.
Ekeýi de marqumnyń týystarynan keshirim surady.
«Men aıyptymyn. Oǵan kómektespeýim kerek edi. Materıaldyq shyǵynmen kelisemin. Biraq moraldyq aıyptaýmen kelispeımin. Sebebi men adam óltirgen joqpyn», - dedi Ashat Barjaqsın.
Aıta ketý kerek, 22 jastaǵy qyz aqpannyń 9-nan 10-na qaraǵan túni Almaty oblysy Jańa Qýat kottedj qalashyǵyndaǵy qurbysynyń úıine shash úlgisin jasaýǵa baryp, sodan úıine oralmaǵan. Anastasııa qurbysynyń úıinen tún ishinde saǵat 23:30-da shyqqan.
Oqys oqıǵadan soń qyzdy izdeý sharalaryna 50 erikti, kınologtar, polıtsııa qyzmetkerleri kiristi. 2 aıdan soń polıtsııa qyzdyń denesin Іle aýdanyndaǵy Mejdýrechınsk aýylyna jaqyn arada kanaldyń shlıýzderiniń birinen tapty.
Aldyńǵy sot otyrysynda prokýror Marat Qasymov istiń mán-jaıyn aıtyp bergen bolatyn.
