Anasynyń amanaty oryndaldy: Aqtóbede Bákir Tájibaevqa eskertkish qoıyldy
AQTÓBE. KAZINFORM — Aqtóbede qazaqtyń kórnekti aqyny, kompozıtory ári dramatýrgi Bákir Tájibaevtyń týǵanyna 100 jyl tolýyna oraı birqatar mádenı is-shara ótti.
Mereıtoılyq sharalar Memleket basshysy Qasym-Jomart Toqaevtyń ulttyq mádenıet pen rýhanııatqa úles qosqan tulǵalardyń murasyn saqtaý jáne dáripteý jónindegi ustanymymen úndesedi. Bákir Tájibaevtyń shyǵarmashylyǵy qazaq óneriniń damýyna úles qosyp, halyqtyń rýhanı qazynasyna aınaldy.
Ǵasyrlyq mereıtoı oblys ákimi Ashat Shaharovtyń aqynnyń urpaqtaryn qabyldaýynan bastaldy. Kezdesýde óńir basshysy qalamgerdiń óleńderi, ánderi men dramalyq shyǵarmalarynyń keıingi býyn úshin mańyzy zor ekenin atap ótti. Óz kezeginde qonaqtar tulǵa esimin ulyqtaýǵa baǵyttalǵan bastamalarǵa qoldaý kórsetilgeni úshin alǵystaryn jetkizdi.
Sharanyń mańyzdy oqıǵalarynyń biri — Oblystyq halyq shyǵarmashylyǵy ortalyǵynyń aldyndaǵy alańda Bákir Tájibaevtyń eskertkish-bıýstiniń ashylýy. Saltanatty rásimge oblys ákimi Ashat Shaharov, aqynnyń uly Jasulan Tájibaev, týǵan-týystary, aqyn-jazýshylar men mádenıet jáne óner qaıratkerleri qatysty.
Eskertkishti ashý qurmeti QR Kompozıtorlar odaǵynyń tóraǵasy Serikjan Ábdinurov pen aqynnyń týysy Aqan Tóleýovke usynyldy. Shara barysynda mereıtoı ıesiniń ánderi oryndalyp, eskertkishke gúl shoqtary qoıyldy. Eskertkish-bıýsttiń avtory — músinshi, monýmentaldy óner sheberi Bolatbek Salaev.
— Bákir aǵamyzdyń ómiri men shyǵarmashylyǵy Aqtóbe óńirimen bite qaınasyp jatyr. Ol týǵan jeriniń tabıǵatyn, el turmysyn, adam jan dúnıesin shyǵarmalaryna arqaý etti. Aqynnyń syrly jyrlary men ásem ánderi búginde halqymyzdyń rýhanı qazynasyna aınaldy. Bul ǵımarat — halyq shyǵarmashylyǵyn nasıhattaıtyn rýhanı ordalardyń biri. Munda kelgen árbir jan Bákir aǵamyzdyń beınesine taǵzym etip, onyń óneri men ónegesinen rýhanı nár alady dep senemin, — dedi aımaq basshysy quttyqtaý sózinde.
Aqynnyń uly Jasulan Tájibaev eskertkishtiń ashylýy otbasy úshin kópten kútken armannyń oryndalýy ekenin aıtty. Onyń sózinshe, bul bastama anasynyń amanaty bolǵan.
Sondaı-aq mereıtoı aıasynda qalamgerdiń ómiri men shyǵarmashylyǵyna arnalǵan «Aqbulaq aǵa» kitabynyń tanystyrylymy ótti. Kitap avtory — Mádenıet salasynyń úzdigi Oral-Qosaı Baıseńgir. Jınaqqa aqynnyń segiz dramalyq shyǵarmasy, sondaı-aq avtordyń óz týyndylary men Bákir Tájibaev týraly jazylǵan pesalar engizilgen.
Mereıtoı baǵdarlamasy T.Ahtanov atyndaǵy Aqtóbe oblystyq drama teatrynda «Aqbulaq aǵa» spektakl-elegııasynyń qoıylymymen jalǵasty. Shyǵarmada Bákir Tájibaevtyń ómir joly, shyǵarmashylyq izdenisteri, azamattyq bolmysy men týǵan jerine degen súıispenshiligi beınelengen.
Spektakldiń avtory — Oral-Qosaı Baıseńgir. Rejısserleri — Qazaqstannyń eńbek sińirgen qaıratkeri Saılaý Qamıev pen Aqnıet Jaqsyǵalı.
Bákir Tájibaev qazaq poezııasy, mýzykasy men dramatýrgııasynda ózindik qoltańbasyn qaldyrdy. Onyń shyǵarmalarynda týǵan jerge súıispenshilik, adamgershilik, mahabbat pen saǵynysh taqyryptary keńinen kórinis tapqan. Aqtóbede ótken mereıtoı aqynnyń ulttyq mádenıettegi ornyn aıqyndap, shyǵarmashylyq murasyn jańa býynǵa tanytýǵa baǵyttaldy.
