Anasyn urǵan Taldyqorǵan turǵyny 10 kúnge qamaldy

TALDYQORǴAN. KAZINFORM — Taldyqorǵan qalasy sotynyń úkimi boıynsha 33 jastaǵy qala turǵyny anasyna dene jaraqatyn keltirý faktisi boıynsha 10 kúnge qamaýǵa alyndy.

Onyń is-áreketi QK-niń (Uryp-soǵý) 109-1-babynyń 1-bóligine sáıkes saralandy.

— Jábirlenýshi sotta otbasylyq janjal kezinde ulynyń ony birneshe ret urǵanyn aıtty, — delingen habarlamada.

Aıta ketý kerek, Qylmystyq kodekske engizilgen túzetýler men tolyqtyrýlarǵa sáıkes bul bap ákimshilik quqyq buzýshylyqtar sanatynan qylmystyq quqyq buzýshylyqtar sanatyna aýystyrylyp, jazany qataıtýǵa múmkindik berdi.

Statıstıkaǵa sáıkes, tek 2024 jyly QK-niń 109-1-babyna sáıkes 161 adam, al 2025 jyldyń ótken merziminde 31 adam jaýapqa tartylǵan.

Oblys prokýratýrasy azamattardy, eger siz nemese sizdiń tanystaryńyz osyndaı jaǵdaıǵa tap bolsa, nemquraıly qaramaı, polıtsııaǵa mindetti túrde habarlaýǵa shaqyrady.

Quqyqtyq tártip organdary zardap shekkenderge kómek kórsetýge jáne zań aıasynda qorǵaý sharalaryn qabyldaýǵa daıyn.

Aıta ketsek ІІM jyl saıyn turmystyq zorlyq-zombylyq týraly 100 myńnan asa habarlama túsetini týraly aıtqan edi.