Anasyn pyshaqtaǵan kúdikti Vetnamnan ekstradıtsııalandy
ASTANA. KAZINFORM — Vetnamnan densaýlyqqa qasaqana aýyr zııan keltirgen kúdikti ekstradıtsııalandy.
Bas prokýratýra men Іshki ister mınıstrliginiń Interpol UOB-sy qyzmetkerleriniń Qazaqstan Respýblıkasynyń Vetnam Sotsıalıstik Respýblıkasyndaǵy elshiliginiń járdemdesýimen atalǵan elden densaýlyqqa qasaqana aýyr zııan keltirgeni úshin qylmystyq jaýaptylyqqa tartý maqsatynda Qazaqstan Respýblıkasynyń azamaty ekstradıtsııalandy.
— Ol ótken jyldyń qarasha aıynda óz úıinde alkogoldik masań kúıde bolyp, janjaldan keıin anasyna birneshe ret pyshaq salyp alǵan dep kúdikteldi.
Qylmys jasaǵannan keıin zańda belgilengen jaýaptylyqtan jaltarý maqsatynda kúdikti qylmystyq qýdalaý organynan boı tasalap, osyǵan baılanysty halyqaralyq izdeýge jarııalandy, — delingen habarlamada.
Jedel-izdestirý is-sharalary barysynda onyń Vetnam Sotsıalıstik Respýblıkasynyń aýmaǵynda júrgeni anyqtalyp, maýsym aıynda ol Danang qalasynda ustaldy, sodan keıin Qazaqstan Respýblıkasy Bas prokýratýrasynyń suraýy boıynsha elge ekstradıtsııalandy.
Qazirgi ýaqytta kúdikti ýaqytsha ustaý ızolıatoryna qamaldy.
Oǵan taǵylǵan qylmysty jasaǵany úshin úsh jyldan segiz jylǵa deıingi merzimge bas bostandyǵynan aıyrý túrindegi jaza kózdelgen.
Aıta ketelik Qazaqstan Interpol arqyly izdeý salǵan adam Grýzııada qolǵa túsken edi.
