Anasyn óltirip, ájesin jaraqattady: Aqtóbede oqýshynyń nelikten mundaı qylmysqa barǵany belgili boldy
AQTÓBE. KAZINFORM — Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda kámeletke tolmaǵannyń isi boıynsha sot aldy tyńdaýy ótti. Prokýror qylmystyq istiń qalaı bolǵanyn baıandap berdi.
Oqıǵa byltyr jeltoqsan aıynda boldy. Oqýshy sol kezde memlekettik emtıhanǵa daıyndalyp júrgen.
— Aqtóbe qalasyndaǵy № 28 orta mektepte bilim alyp júrgen balanyń oqý úlgerimi nasharlaǵan soń anasy jeke mektepke aýystyrady. Alaıda sabaq úlgerimi jańa mektepke barǵan soń da jaqsarmady. Anasy men balasy arasynda kelispeýshilik bolǵan. 2025 jyly 1 jeltoqsanda saǵat 23:00 shamasynda ol anasy, ájesi, inisimen birge tamaqtanady. Keıin oqýshy emtıhandaǵy tańdaý páni unamaıtynyn jáne ózi úshin ata-anasynyń tańdaý jasaǵany týraly oıyn bildirý maqsatynda anasy jatqan bólmege jaqyn baryp, sóılesip, jetkizgen. Alaıda anasy qulaq aspaı, mán bermeı, tóseginde jata bergen. Balasy as bólmesinde sý iship otyrǵan kezde anasy janyna baryp, sóziniń durys emes ekenin aıtady. Sol kezde oqýshy qol jýatyn orynnyń qasyndaǵy shkaftan pyshaqty kórip, shızofrenııa dertine baılanysty psıhıkalyq jaǵdaıy turaqsyz kúıde anasyn bólmesine deıin qýyp baryp, denesiniń ár bóligine pyshaq salǵan. Anasy oqıǵa ornynda kóz jumady, — dedi prokýror Eldar Abıev.
Nemeresiniń qylmys istegen sátin kórip, ony toqtatpaq bolǵan qarııa da pyshaq jaraqatyn aldy. Aýrýhanaǵa jatqyzylyp, em qabyldady. Sot psıhologııalyq-psıhıatrııalyq saraptama qorytyndysy boıynsha jasóspirimge paranoıdty shızofrenııa dıagnozy qoıylǵan. Ol oblystyq psıhıkalyq densaýlyq saqtaý mekemesinde jatyr.
Іs boıynsha eki jábirlenýshi bar. Olar pyshaq jaraqatyn alǵan ájesi jáne anasynyń baýyry, ıaǵnı naǵashysy. Aqtóbe qalalyq bilim bóliminiń mamany sotqa oqýshynyń zańdy ókili retinde qatysady.
Aıta keteıik, is Qylmystyq kodekstiń 99-baby 1-bóligi, 24-baby 3-bóligi jáne 99-baby 2-bóligi 1-tarmaǵymen qaralady. Basty sot talqylaýy kelesi aptada bolady.
Eske salsaq, sol kezde oqýshy 16 jasta boldy. Tolyq otbasynda tárbıelendi jáne áleýmettik jaǵdaıy jaqsy dep baǵalandy.
