Anasy terezeden laqtyrǵan pavlodarlyq bala aýylda turýdy qalaıdy

PAVLODAR. KAZINFORM — Jeti jasar jetkinshek oblystaǵy aýyldardyń birinde ákesiniń qaraýynda. Ol qalaǵa oralýdan úzildi-kesildi bas tartyp otyr.

Pavlodar oblysy boıynsha balalar quqyǵy jónindegi ýákil Sáýle Shákenova balaǵa baryp, jaǵdaıyn surap qaıtqan. Onyń sózinshe, jetkinshek Ekibastuzǵa qarasty aýyldardyń birinde turyp jatyr. Oǵan inisiniń qaıtys bolǵany týraly áli aıtylmaǵan.

— Áńgimelesý barysynda bala aýylda qala bergisi keletinin jetkizdi. «20 jyl aýylda turamyn», — dedi. Qalaǵa qaıtýdan úzildi-kesildi bas tartty. Ákesi balasy úshin aýylǵa kóship barýǵa kelisip otyr. Men birden Ekibastuz qalasy ákiminiń orynbasary Bıbigúl Imanǵalıevaǵa habarlasyp, jaǵdaıdy túsindirdim. Ol balaǵa medıtsınalyq kómek kórsetý, odan ári ońaltý, jergilikti mektepke aýystyrý, sondaı-aq ákesin jumysqa ornalastyrýǵa baılanysty máselelerdi jeke baqylaýyna alatynyna sendirdi, — deıdi Pavlodar oblysy boıynsha balalar quqyǵy jónindegi ýákil Sáýle Shákenova.

Qazir jetkinshekti ákesi qarap otyr, onyń únemi kóz aldynda bolǵanyn qalaıdy.

Bala aýrýhanada jatqanda psıholog kómegin alǵan. Ombýdsmenniń aıtýynsha, oǵan mundaı kómek áli de uzaq ýaqyt qajet bolady.

Eske sala keteıik, 30 shilde kúni Pavlodarda áıel eki balasyn terezeden laqtyryp, ózi de sekirip ketken.

Keıin áıel men eki balasynyń terezeden qulaýy boıynsha qylmystyq is qozǵaldy.

Al 1 tamyz kúni bıiktikten qulaǵan balalardyń biri kóz jumdy.

Dárigerler tiri qalǵan jetkinshektiń jaǵdaıy týraly aıtqan.

Jaqynda jetkinshek aýrýhanadan shyqqany týraly da habarlaǵan bolatynbyz.