«Anashym, aqsha kerek»: Jaqynyńyz beıneqońyraý arqyly aqsha surasa, ne isteý kerek
ASTANA. KAZINFORM — Abaı oblysynyń Polıtsııa departamenti azamattardy jasandy ıntellekt arqyly jasalatyn alaıaqtyq shemalardan saq bolýǵa shaqyrady.
Telefonnan jaqyn adamyńyzdyń daýysy estildi. Beıneqońyraý bolsa, ekrannan onyń óz beınesin kórip tursyz. «Anashym, qıyn jaǵdaıǵa tap boldym. Shuǵyl aqsha kerek. Qazir aýdaryp jibershi…» deıdi. Daýysy da, túri de óziniki sııaqty. Biraq bul shyn máninde alaıaq bolýy múmkin.
— Qazirgi tańda alaıaqtar jasandy ıntellekt kómegimen adamnyń daýysyn ǵana emes, bet-beınesin de qoldan jasap, beıneqońyraý kezinde jaqyn adamyńyz bolyp kórinýi múmkin. Mundaı tásilder adamnyń senimine kirip, ony shuǵyl aqsha aýdarýǵa májbúrleý úshin paıdalanylady, — deıdi tártip saqshylary.
Abaı oblysy PD alaıaqtan qorǵanýdyń 5 jolyn atady:
1. Asyqpańyz. «Shuǵyl aqsha kerek» degen ótinishke birden senbeńiz.
2. Qońyraýdy toqtatyp, jaqyn adamyńyzǵa óz nómiri arqyly qaıta habarlasyńyz.
3. Otbasy múshelerimen aldyn ala qupııa sóz nemese suraq kelisip qoıyńyz.
4. Bank kartasynyń derekterin, SMS-kodtardy jáne parolderdi eshkimge bermeńiz.
5. Kúmándi jaǵdaıǵa tap bolsańyz, polıtsııaǵa habarlasyńyz.
— Daýysyn tanyǵanyńyzǵa da, beınesin kórgenińizge de tolyq senbeńiz. Aldymen tekserińiz! Bir mınýttyq tekserý — úlken qarjylyq shyǵynnyń aldyn alady, — dep eskertti vedomstvo mamandary.
Budan buryn BQO-da WhatsApp arqyly 15 adamdy aldaǵan úsh alaıaq sottalǵanyn jazǵanbyz.
