Anar Jaılǵanova elordadaǵy jańa HQKO-nyń jumysymen tanysty

NUR-SULTAN. QazAqparat - Búgin QR memlekettik qyzmet isteri agenttiginiń tóraǵasy Anar Jaıylǵanova Nur-Sultan qalasyndaǵy ekinshi Mamandandyrylǵan Halyqqa qyzmet kórsetý bóliminiń (Mamandandyrylǵan HQKO) jańa ǵımaratynda boldy.

Bul týraly QazAqparat tilshisi QR Memlekettik qyzmet isteri agenttiginiń resmı saıtyna silteme jasap habarlaıdy.

Mamandandyrylǵan HQKO-nyń jańa keńsesi «Nurly Jol» jańa temirjol vokzalynyń ǵımaratynda ornalasqan.

Ortalyqtyń jumysymen tanysý barysynda Anar Jaılǵanova halyqqa memlekettik qyzmet kórsetýdiń basty qaǵıdattary - bul turǵyndarǵa kedergisiz, sapaly jáne jyldam qyzmet kórsetý ekenin atap ótti.

Sondaı-aq, jańa mamandandyrylǵan HQKO-nyń jumysy tsıfrlyq damý, ınnovatsııalar jáne aeroǵarysh ónerkásibi mınıstri B.Mýsınge jáne Nur-sultan qalasynyń ákimi A. Kólginovke tanystyryldy.

Halyqqa qyzmet kórsetý ortalyǵynyń bul bólimshesiniń ashylýy azamattar úshin birqatar memlekettik qyzmetterdi jedel túrde alýdaǵy qosymsha alań bolady, bul qyzmet alý ýaqytyn ońtaılandyrýda jáne sapany edáýir arttyrýda mańyzdy faktor bolyp tabylady.

Mamandandyrylǵan jańa HQKO-da azamattar endi óz avtokólikterin qaıta tirkeı alatynyn jáne júrgizýshi kýáligin aýystyra alatyndyǵyn atap ótý qajet.

Atalǵan bólimde avtokólikti qaıta tirkeý úshin 23 jumys ústeli, júrgizýshi kýálikterin aýystyrý úshin 3 jumys orny jumys isteı bastady, sondaı-aq jeńildik qarastyrylǵan arnaıy terezeler uıymdastyryldy.

9 aıda Nur-sultan qalasynyń mamandandyrylǵan HQKO- da kólik quraldaryn tirkeý boıynsha 158 myń, júrgizýshi kýálikterin berý jáne aýystyrý boıynsha 21 myń qyzmet kórsetildi. Azamattar aǵynynyń 60% jańa mamandandyrylǵan HQKO-ǵa ótedi dep kútilýde. Aldaǵy ýaqytta birinshi mamandandyrylǵan HQKO qujattardy alǵash resimdeýge kelgen azamattarǵa qyzmet kórsetetin bolady.

Kelýshilerge yńǵaıly bolý úshin jańa mamandandyrylǵan HQKO-da kommertsııalyq bankterdiń kassalary, mýltıkassalar jumys isteıdi, kelýshiler úshin sondaı-aq, kóptegen oryndary bar yńǵaıly avtoturaqtar qarastyrylǵan (aqyly jáne tegin).

Osylaısha, jańa bólimde ekinshi deńgeıdegi bankterdiń 5 esep aıyrysý-kassalyq bólimi ornalasatyn bolady, kassalardyń biri múmkindigi shekteýli adamdarǵa qyzmet kórsetý úshin arnaıy jabdyqtalǵan, sondaı-aq kútý zaly eldegi epıdemıologııalyq jaǵdaıdy, áleýmettik qashyqtyqty eskere otyryp 150 orynǵa shaqtalǵan.

Jalpy, aǵymdaǵy jyldyń sońyna deıin munda 20 000 - nan astam, avtokólik quraldaryn tirkeý/qaıta tirkeý boıynsha 17 000 - ǵa jýyq, júrgizýshi kýálikterin - 3 000-ǵa jýyq qyzmet kórsetý josparlanyp otyr.