Anar Fazyljan: Quryltaı men Halyq keńesi termınderin Konstıtýtsııaǵa basqa tilge aýdarmaı jazý kerek

ASTANA. KAZINFORM — Almaty qalasy qoǵamdyq keńesiniń múshesi, Ahmet Baıtursynov atyndaǵy Til bilimi ınstıtýtynyń basshysy Anar Fazyljan Konstıtýtsııalyq reforma jónindegi komıssııanyń búgingi otyrysynda bir palataly Parlamentti qazaq tilindegi ataýymen, aýdarmasyz qoldanýdy usyndy. 

— Ata zań jobasyn qazaq jáne orys tilderinde bir mezgilde ázirleý usynysyn qoldaımyn. Osy oraıda Konstıtýtsııanyń orys tilindegi mátininde Ulttyq quryltaı jáne Halyq keńesi ataýlaryn qazaq tilinde jazýdy mańyzdy dep sanaımyn. Sebebi zań shyǵarýǵa bastama etetin quqyǵy bar eń joǵary ókiletti organdardyń ataýy qoǵam sanasynda bir tilde, bir uǵymda qalyptasý qajet, — dedi ol.

Ǵalym mundaı tájirıbe bizdiń qazir de bar ekenin eske saldy.

— Mysaly, tómengi palata — Májilis ataýy memlekettik tildegi nusqada qoldanylyp kele jatyr. Sondyqtan osy úrdistiń jalǵasy retinde Ulttyq quryltaı jáne Halyq keńesi ataýlaryn basqa tilderdegi aýdarmasyz, qazaq tilindegi nusqada bekitý qısyndy dep sanaımyn. Komıssııadan osy usynysymdy qoldaýdy suraımyn, — dedi sarapshy.

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.