Anar Abjanova jas ta bolsa álemge tanylyp, ózindik qoltańbasy qalyptasyp úlgergen sýretshi - Arystanbek Muhamedıuly
ALMATY. 12 jeltoqsan. QazAqparat /Názıra Eleýhan/ - Qazaqstanda sýret óneri damyp jatyr. Oǵan jas ta bolsa álemge tanymal bolyp úlgergen bir ǵana sýretshi Anar Abjanova óneriniń ózi dálel bola alady. Bul týraly búgin Almatyda jas sýretshi Anar Abjanovanyń shyǵarmashylyq jetistikterine arnalǵan baspasóz máslıhatynda T.Júrgenov atyndaǵy Óner akademııasynyń rektory Arystanbek Muhamedıuly aıtty.
«Anar Abjanova ónerdegi erekshe qubylysty jan. Jasy 25-te bolsa da, qazirdiń ózinde ol álemge tanymal, ózindik qoltańbasy qalyptasyp úlgergen sýretshi. Eshbir kásipqoı sýretshiden dárejesi kem túspeıdi. Onyń jumystary óz elimizben qatar, Italııanyń, Shveıtsarııa, Frantsııa, Túrkııa, AQSh, Japonııa jáne Vengrııa men Reseı elderiniń jeke kollektsııalarynda tur. Jaqynda Anar Japonııada ótken halyqaralyq sýretshiler kórmesinen kúmis medaldy, beıneleý óneri damyǵan degen Iran elinde Bas júldeni, Reseıde ótken «Óner aptalyǵy» baıqaýynda І oryndy jeńip aldy. Budan ózge onyń túrli kórmeler men baıqaýlarda alǵan marapattary kóp. Taǵy bir atap óterligim, ol keshe ǵana Chıkagodaǵy Santıago qalasynan altyn medalmen oraldy. Bul biz úshin, elimiz úshin úlken qurmet»,-dedi Arystanbek Muhamedıuly.
Jas sýretshiniń ustazy, ataqty sýretshi Qanafııa Teljanovtyń aıtýynsha, Anar Abjanovanyń bolashaǵy zor. «Men odan áli de úlken úmit kútem. Meniń Anar sııaqty daryndy da, talantty shákirtterim kóp. Sol úshin de oqýshylarymdy maqtan tutamyn», -dedi Q. Teljanov.
«Anarǵa baılanysty «ustazynan shákirti ozdy» dep aıtýǵa ábden bolady. Onyń ózindik qoltańbasy bar. Ol óte izdenimpaz, eńbekqor, sonyń jáne qudaıdyń bergen erekshe qabiletiniń, sondaı-aq, baıaǵydan qalyptasqan, álem tanyǵan ataqty sýretshi Qanafııa Teljanov mektebinen ótýiniń arqasynda úlken jetistikterge jetip otyr. Óner akadamııasy qabyrǵasyndaǵy úlken mektep onyń qabiletin ashyp, damytty. Anar búginde bizdiń maqtan tutatyn shákirtimiz»,- deıdi jas sýretshiniń ekinshi ustazy Baýyrjan Baıdildá.
Onyń aıtýynsha, Anardyń qazir birneshe týyndylary AQSh-taǵy Nıý-Iork qalasynda kórme-baıqaýǵa qatysýda.
Baspasóz máslıhatyna jas sýretshiniń ózi de qatysty. «Men 7 jastan sýret sala bastadym. Sýretke degen qyzyǵýshylyǵym súıispenshilikke artty. Sonyń nátıjesinde ómir jolym sýretshilikke ákeldi. 18 jyl ishinde 1000-nan asa kartınalar saldym. Alǵashynda natıýrmort salýdy unatatyn edim, qazir tabıǵat kórinisterin salǵandy janym súıedi. Kúni-túni sýret salǵandy unatamyn, odan esh jalyqqan emespin, kerisinshe, ár týyndymnan shabyt alamyn», -deıdi Anar Abjanova.
Anar Abjanova 1986 jyly Almatyda dúnıege kelgen. Anardyń estý qabileti bolmasa da, basqalarǵa qaraǵanda qorshaǵan álemdi ózge kózben kóredi. Qazir jas sýretshi T.Júrgenov atyndaǵy Óner akademııasynyń «Keskindeme jáne músin» fakýltetiniń 5 kýrsynda, ataqty sýretshi Qanafııa Teljanovtyń sheberhanasynda oqıdy. Anar 2001 jyldan 30-dan asa ár túrli respýblıkalyq jáne halyqaralyq kórmelerdiń qatysýshysy, kóptegen baıqaýlar men festıvalderdiń dıplomanty bolyp tabylady. Elimizdiń ár jerindegi galereıalarda birneshe jeke kórmelerin ótkizip úlgergen.
