Anany jalǵa alý: Qazaqstanda sýrrogat ana qyzmeti qansha turady
ASTANA. KAZINFORM - Qazaqstan kórshi elderden keletin bedeý erli-zaıyptylar úshin tartymdy elge aınalyp otyr. QR emhanalarynda jasandy uryqtandyrý baǵdarlamasynyń baǵasy tómen, al el zańnamasy sýrrogat ananyń qyzmetin paıdalanatyn juptarǵa yńǵaılanǵan. Bizdiń elde bireýdiń balasyn kóterip júrgen áıel ony ózine alyp qala almaıdy, sábıdi genetıkalyq ata-anasyna berýge mindetti.
QR-da sýrrogat ana bolý qatań retteledi jáne júktilik kezinde fıgýrasyn buzýdan qorqatyn baı áıelderdiń yńǵaıyna jyǵylmaıtynyn atap ótken jón.
Zań boıynsha sýrrogat ana qyzmetin tek myna shartty oryndaǵan erli-zaıyptylar paıdalana alady: nekesi tirkelgen, bedeýlik dıagnozy qoıylǵan, áıel fızıologııalyq turǵydan bala kóterýge jáne bosanýǵa qabiletsiz ekeni naqtylanǵan.
Sýrrogat ana baǵdarlamasy qymbat turady. Ranking.kz redaktsııasy osy qyzmet naryǵyna monıtorıng júrgizip, sýrrogat izdeýdiń kem degende úsh arnasyn tapty.
Eń qarapaıym jáne arzan, biraq zań jaǵynan eń qaýiptisi — agregat saıttardaǵy nemese áleýmettik jelilerdegi jeke jarnamalar.
Oǵan sensek, qazaqstandyq sýrrogat analar 2,5 mln teńgeden 9 mln teńgege deıin somaǵa ózgeniń balasyna ýaqytsha ana bolýǵa daıyn.
Sonymen qatar, olardyń qyzmetine eń joǵary baǵany bedeý juptarǵa bala ákelýde qomaqty tájirıbesi bar áıelder belgileıdi.
Sýrrogat anany tabýdyń ekinshi nusqasy — reprodýktıvti medıtsına klınıkasyna tikeleı habarlasý.
EKU ortalyqtaryna monıtorıng júrgizgen kezde olardyń az ǵana bóliginde senimdi sýrrogat analardyń jeke málimetter bazasy bar ekeni belgili boldy.
Bul áıelder qyzmetiniń quny — 3-7 mln teńge aralyǵynda.
EKU klınıkalarynyń kóbinde úmitkerlerdiń jeke tizimi joq jáne olar sýrrogat ana agenttikteriniń qyzmetin paıdalanýdy usynady.
Qazaqstanda mundaı uıymdardyń sany týraly resmı málimet joq. Naryqty saralaı kele Almaty men Astanadan osyndaı 10-nan astam agenttikti anyqtadyq.
Olardyń saıtyndaǵy derekterge qaraǵanda, sýrrogat ana aqysy 4,5-8 mln teńge aralyǵynda aýytqıdy.
Sondaı-aq reseılik agenttikterdiń Qazaqstandaǵy sýrrogat analardyń qyzmetteri týraly habarlandyrýlar da jelide jarııalanǵan. Mundaı jaǵdaıda quny joǵary: 7 mln teńgeden 13 mln teńgege deıin.
Bul sandar — erli-zaıyptylar tóleıtin tolyq soma emes. Bul erekshe qyzmet tek qymbat reprodýktıvti tehnologııanyń kómegimen júzege asýy múmkin.
Sondyqtan EKU baǵdarlamalarynyń qunyn eskerý qajet. Genetıkalyq ata-ananyń mundaı jaǵdaıda jumsaıtyn shyǵynyn esepteý kezinde biz barlyq negizgi mindetti jáne qosymsha qyzmetterdi eskerdik.
Sýrrogat ana shyǵynynyń negizgi paketine áıeldiń sońǵy jarnasy ǵana emes, onyń aı saıynǵy kútimi de (200 myń teńgeden 250 myń teńgege deıin) kiredi.
Mindetti shyǵyn — genetıkalyq ata-anaǵa arnalǵan EKU baǵdarlamasyn tikeleı júzege asyrý medıtsınalyq tekserýdi esepke alǵanda 1,5–2 mln teńge turady.
Atalyq jynys jasýshalaryn joıý nemese embrıonǵa qosymsha genetıkalyq zertteý júrgizý úshin hırýrgııalyq medıtsınalyq protsedýralardy júrgizý qajet bolsa, soma odan da joǵary bolýy múmkin.
Mindetti shyǵyndarǵa genetıkalyq ata-analar men sýrrogat ana arasynda kelisim jasaý boıynsha notarıaldyq qyzmetter de kiredi: shamamen 60 myń teńge.
Osylaısha, sýrrogat ana baǵdarlamasynyń mańyzdy kezeńderin júzege asyrýǵa qajetti negizgi soma — 6,7 mln-11,3 mln teńge aralyǵynda.
Shyǵynnyń qosymsha paketi úshin taǵy 3,1 mln teńgeden 4,2 mln teńgege deıin bólý qajet. Ol júktilik nemese bosaný kezinde kútpegen jerden týyndaýy múmkin shyǵyndardy, sondaı-aq tańdaý qyzmetterin qamtıdy.
Mysaly, mamandandyrylǵan mekemege habarlasqanda sýrrogat anany tańdaý úshin agenttik aqy talap etýi múmkin (550 myń teńgeden 1 mln teńgege deıin).
Basqa qaladan kelgen genetıkalyq ata-anaǵa uıymdar kýratorlyq qoldaý men patronattyq qyzmetterdi de usynady (bir júktilikke 1 mln teńgege deıin).
Bul — agenttik kýratory sýrrogat anany únemi aýrýhanaǵa aparatyn, týyndaǵan máseleni sheshýge kómektesetin jáne basqa múmkindik beretin nusqa.
Qoldaýdyń VIP paketine tipti sýrrogat ananyń tamaqtanýyn baqylaý, oǵan kitap tańdaý, onyń úıin apta saıyn tazalaý jáne basqa qyzmetter kiredi.
Mańyzdy qosymsha qyzmetterge tabıǵıdan erekshelenetin jáne dárigerlerdiń erekshe nazaryn talap etetin sýrrogat ananyń júktiligin basqarýǵa arnalǵan aqyly baǵdarlamalar (400 myń teńgege deıin) jáne qalaǵan jaǵdaıda aqyly bosaný (taǵy 120–400 myń teńge) kiredi.
Eger sýrrogat ana egiz balany dúnıege ákelse nemese dárigerler bosaný úshin hırýrgııalyq otany tańdasa, áıelge qosymsha ótemaqy tóleýge týra keledi.
Sýrrogat ana baǵdarlamasy boıynsha mindetti jáne qosymsha qyzmetterdi qorytyndylasaq, shyǵyn mynadaı: 9,8 mln teńgeden 15,5 mln teńgege deıin.
Ulttyq banktiń bıylǵy aqpan aıyndaǵy baǵamy boıynsha bul soma 21,8 myńnan 34,4 myń AQSh dollaryna deıin jetedi.
Alynǵan málimetti ózge elderdegi sýrrogat ana baǵdarlamalarynyń qunymen salystyraıyq. Ashyq kózden alynǵan aqparatqa qaraǵanda, eń joǵary baǵany mundaı baǵdarlamalarǵa tyıym salynbaǵan Eýropa elderinde tabýǵa bolady.
Mysaly, Chehııada sýrrogat ana baǵdarlamasy — 65–85 myń, Belgııada — 54–65 myń, Danııada — 50–60 myń AQSh dollary.
Eń jaqyn kórshimiz Reseıde mundaı baǵdarlamalardyń baǵasy eýropalyqtarmen shamalas: 60 myń AQSh dollaryna deıin barady.
