Anamnyń jas kezin esime saldyńyz - Italıada qazaq opera ánshisine erekshe baǵa berildi
ASTANA. KAZINFORM – Qazaqstandyq jas juldyz, opera ánshisi Áıgerim Altynbek Italıada basynan ótken erekshe jaıdy aıtyp berdi
— Qarasha aıynda Modena qalasynda Gıaýrov atyndaǵy baıqaý boldy. Ol álem boıynsha dárejesi joǵary baıqaýlardyń biri. 27 memleketten qatysýshylar keldi. Jalpy baq synaýshylardyń sany 482-ge jetti. Bul meniń — eń birinshi úlken baıqaýym, onda oryn alamyn, maǵan ról usynady dep kútpedim. Italıada Mırella Frenı degen keremet opera ánshisi bolǵan, álemdik ánshi. Bul jarysta úshinshi oryn aldym, oǵan qosa Mırella Frenı atyndaǵy júldeni tabystady, - dedi Áıgerim Altynbek.
Qazaqstandyq ánshi osy baıqaýdan soń Mırella Frenıdiń qyzymen tildeskenin jáne onyń bir sózi esinen shyqpaıtynyn aıtty.
— Siz meniń anamnyń jas kezin esime túsirdińiz. Bul — men úshin teńdessiz teńeý. Óıtkeni ol álemde teńdesi joq sopranolardyń biri. Ol kisiniń qyzynan sondaı sóz estý men úshin úshinshi oryn emes, gran-prımen para-par boldy, - dedi Áıgerim.
Aıta keteıik, Áıgerim Altynbek búgingi tańda Italıanyń Parma qalasynda Arrıgo Boıto atyndaǵy konservatorııada 2-kýrs stýdenti.
Sonymen qatar qazirgi kezde túrli álemdik baıqaýlarǵa qatysyp, úzdikter qatarynan kórinip júrgen, bolashaǵynan zor úmit kúttiretin jas talant.
Buǵan deıin óner ıesi kópshiliktiń operaǵa sýretke túsý úshin emes, mýzyka tyńdaý úshin barsa eken degen tilegin jetkizdi.