«Anamnyń emine aqsha kerek»: Óskemen turǵyny tanysyna kómektesemin dep 7 mln teńge shyǵynǵa batty

ÓSKEMEN. KAZINFORM — Óskemen qalasynyń turǵynyn aldap soqqan alaıaqqa qatysty qylmystyq is qozǵaldy.

Polıtsııaǵa habarlasqan áıel aldanyp qalǵanyn aıtyp, aryz jazdy. Belgili bolǵandaı, ony 2023 jyldyń qańtar aıynda tanysy áńgimege tartyp, anasynyń emine aqsha qajettigin jetkizgen. 

Buǵan sengen áıel adam iri kólemde aqsha bergen. Alaıda sol kúıi aqshasy qaıtarylmady. Osynyń saldarynan keltirilgen materıaldyq shyǵyn kólemi — 7 714 000 teńge.

— Atalǵan fakti boıynsha «Alaıaqtyq» babymen sotqa deıingi tergeý amaldary bastaldy. Qazirgi ýaqytta oqıǵanyń mán-jaıyn tolyq anyqtaýǵa baǵyttalǵan tergeý áreketteri júrgizilip jatyr, — dep habarlady ShQO Polıtsııa departamentiniń baspasóz qyzmetinen.

Osy rette, polıtseıler azamattarly qyraǵy bolýǵa jáne qomaqty qarajatty qujatsyz nemese qolhatsyz berýden aýlaq bolýǵa shaqyrdy. 

Eske salsaq, osyǵan deıin BQO-da 50 mln teńgege alaıaqtyq jasaǵan Almaty turǵyny 11 jylǵa sottalǵany habarlanǵan.