Anamdy izdegenime 6 aıǵa taıady – Jánibek Jumaǵulov
ASTANA. KAZINFORM – Belgııa azamaty asyrap alǵan 22 jastaǵy Jánibek Jumaǵulov (Djanı) Qazaqstanda týǵan anasyn izdep jatyr. Ázirge anasyn tabý múmkin bolmaı tur. Іzdestirý jumystary jalǵasýda.
«Týǵan anamdy izdegenime 6 aıǵa jýyq ýaqyt ótti. Anamdaı bolyp ketken Qymbat apaıym (Qymbat Dosjan) jáne ápkemdeı bolǵan Ásel jáne Arqalyq polıtsııasy izdeýdi toqtatqan emes. DNQ zertteýleri úzdiksiz tapsyrylyp, tekserilip jatyr. Men úshin mańyzdy sanalǵan osynaý izdeý jumystaryna atsalysqan barsha janashyrlaryma alǵys aıtamyn», - degen jazba qaldyrdy ol Instagram paraqshasynda.
Sondaı-aq Jánibek asyrap alǵan anasynyń aýyryp qalǵanyn aıtty.
«Ózime keler bolsam, keıingi kezde jaǵdaıym jaqsy boldy dep aıta almaımyn. Asyrap alǵan anamnyń densaýlyǵy nasharlap, qatty qınalyp jatyr. Men oǵan ekeýmizdiń birge jarııalaǵan aldyńǵy beınerolıgimiz úshin sizderdiń jazǵan júrekjardy pikirlerińizdi oqyp berdim. Biraq munyń bári ýaqytsha kóńilin aýlaý ekenin túsinemin. Josparym týraly aıtar bolsam, aldaǵy ýaqytta meniń balalyq shaǵymnan (balalar úıi) habar beretin ádemi jáne qyzyqty beınebaıan jarııalaımyn. Alla qoldasyn, jaqynda ózderińizben qaıta kezdesemin dep úmittenemin!», - dep jazdy ol.
Eske sala keteıik, belgııalyq Jánibek Jumaǵulovtyń týǵan anasyn tabýǵa qatysty elimizdiń Bas prokýratýrasyna ótinish jibergeni týraly habarlaǵan edik. Sondaı-aq Qazaqstanǵa qaıta kelgen ol Astanadaǵy balalar úıine barǵan edi.
Jánibek elimizge týǵan anasyn izdep kelgen jáne Qazaqstanǵa kelý úshin 6 aı boıy tabysyn únemdep, aqsha jınaǵan. 21 jastaǵy azamat áleýmettik jelide týǵan anasyn izdeý týraly vıdeo habarlamada ózin «Djanı» dep tanystyrǵan.
