Anam jıi et asyp, baýyrsaq pisiredi – kópultty otbasynyń múshesi Raısa Zýeva

PETROPAVL. QazAqparat – Soltústik Qazaqstan oblysy Polıtsııa departamentinde 21 ulttyń ókili eńbek etedi. Sonyń biri – Raısa Zýeva. Onyń ájesi – polıak, ákesi – orys, al anasy – qazaq, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Petropavl turǵyny Raısa Zýeva osydan 3 jyl buryn quqyq qorǵaý organdaryna qyzmetke keldi. Boıjetken bastapqyda ómirin polıtsııamen baılanystyrýǵa sheshim qabyldaǵanda, ata-anasy qarsylyq bildirgen. Biraq ákesi keıin ruqsatyn bergen.

«Tańdaýyma ókingen kezim bolǵan joq. Qazir quqyqtyq tártipti qamtamasyz etýge qatysamyn. Petropavl qalalyq polıtsııa basqarmasynyń qabyldap-taratý ornynda eńbek etemin. Munda kún saıyn úısiz-kúısiz júrgen adamdar jetkiziledi, olardyń saýsaq izderin alamyz. Іzdeýde bar ma-joq pa – tekseremiz. Turǵylyqty mekenjaıy joq adamdarmen jumys isteý muqııat bolýdy, shydamdylyq pen uqyptylyqty talap etedi. Kez kelgen adam, áleýmettik mártebesine qaramastan, eń aldymen adam ekenin umytpaýymyz kerek», - deıdi Raısa Zýeva.

Boıjetken qazaq tilin jetik meńgergen.

«Meniń ájem – polıak, ákem – orys, al anam – qazaq. Bizdiń úıde qazaqtyń ulttyq dástúrleri basym, otbasymyzben jaqynda Aıt meıramyn atap óttik. Anam jıi et asyp, baýyrsaq pisiredi. Men de, sińlim Venera men inim Ámir de – biz ózimizdi birden eki ultqa jatqyzamyz», - deıdi Raısa.

Tártip saqshysynyń aıtýynsha, Qazaqstan halqynyń birligi kúni ol úshin erekshe mereke. Bul joly da kóp ultty otbasy meıramdy keń dastarhan basynda atap ótpek.

SQO Polıtsııa departamentinde qazirgi ýaqytta 21 ulttyń ókili eńbek etip jatyr.