«Analarǵa taǵzym» ortalyǵy - Bopaı, Roza, Álııanyń ómirlerinen syr shertpek

Aqtóbe qalasynyń Batys-2 shaǵyn aýdanyndaǵy qurylys jumysymen oblys ákimi Berdibek Saparbaev tanysty. Joba quny - 500 mıllıon teńge. Medıtsınalyq mekeme zamanaýı materıaldyq-tehnıkalyq bazamen jabdyqtalyp, erekshe kútimdi qajet etetin balalarǵa áleýmettik-psıhologııalyq jáne medıtsınalyq kómek kórsetiledi. Ári Aqtóbede aýtızmmen aýyratyn balalar ortalyǵyn qurý jumystary da júrip jatyr. 

«2018 jyldy biz «Baqytty balalyq shaq» jyly dep jarııaladyq. Balalarǵa medıtsınalyq kómek berý, ata-analardy qoldaý úshin múmkindigi shekteýli balalardy ońaltý, aýtızmge shaldyqqan balalardy qoldaý ortalyqtary men balalar onkologııalyq ortalyǵynyń qurylysy júrip jatyr. Bul úlken jumystyń bir bóligi ǵana»,- dedi oblys ákimi.

Oblys ákimi qala basshylyǵyna qurylys nysandarynyń sapasyn muqııat qadaǵalaýdy, al densaýlyq saqtaý basqarmasyna ortalyqtardy medıtsınalyq qural-jabdyqtarmen jáne bilikti mamandarmen qamtamasyz etýdi tapsyrdy.

Joba «Asyl mıras» qaıyrymdylyq qorynyń qoldaýymen «Aýtızm. Bárine bir álem» baǵdarlamasy aıasynda júzege asyrylady. Ortalyq arqyly balalar men olardyń ata-analaryna bilikti mamandardan tegin keńes alady.

Sondaı-aq, B.Saparbaev qurylysy júrip jatqan «Analarǵa taǵzym» rýhanı-adamgershilik tárbıe ortalyǵynda boldy.

Aqtóbe oblysy ákiminiń baspasóz qyzmetiniń habarlaýynsha, ortalyqta Bopaı hanym, Nursulý Tapalova, Roza Jamanova, Álııa Moldaǵulova, Aqqaǵaz Dosjanova syndy qazaq áıelderiniń ómiri men erlikteri kórsetiledi. Ekspozıtsııalyq zalǵa qajetti materıaldar jınaqtalyp jatyr. Keshende psıhologııalyq jeńildeý jáne keńes berý, qolóner, jalpy damý, mýzykalyq tárbıe berý, stılıstıka men dızaın, otbasylyq jattyǵýlar ótkizetin jáne taǵy basqa kabınetter ornalasady.

Jalpy, ortalyq qyzmeti áıel zatynyń otbasyndaǵy rólin kúsheıtýge, bolashaq analardy halqymyzdyń salt-dástúrin  úırete otyryp, tárbıeleýge baǵyttalatyn bolady.