Analarǵa kórsetiletin áleýmettik qoldaýdyń tıimdiligi artady - mınıstr
Aıta ketsek, «Habar» arnasyndaǵy «Ashyq dıalog» baǵdarynda júrgizýshi Dáýren Abaevtan elordadaǵy bes balanyń ólimine qatysty suraq qoıǵan edi.
«Shynynda da, óte qaıǵyly jaǵdaı boldy. Prezıdent qaıtys bolǵan balalardyń ata-anasy men týystaryna kóńil aıta otyryp, mundaı jaǵdaıdyń eshqashan qaıtalanbaýy úshin tıisti tapsyrma berdi. Qazaqta «Atam-aı dep jylatsań da, botam-aı dep jylatpa» degen sóz bar. Ózińiz biletindeı, kúni keshe ǵana elimizdegi azamattardyń tabysyn arttyryp, ómir sapasyn jaqsartý baǵytynda jumys toby qurylǵan bolatyn. Sonymen birge, kópbalaly otbasylardy qoldaý sharalaryn kúsheıtý týraly mindet júktelgen edi. Ol jumys tobyn vıtse-premer Erbolat Asqarbekuly Dosaev basqardy», - dedi Dáýren Abaev.
Mınıstrdiń aıtýyna qaraǵanda, jumys tobynyń qyzmetin Memleket basshysynyń ózi jiti baqylaýyna almaq.
«Jumys toby usynǵan sharalar analarǵa kórsetiletin áleýmettik qoldaý tetikteriniń tıimdiligin arttyraryna senimdimin», - dep túıdi Dáýren Abaev.
Eske sala ketsek, Aqparat jáne kommýnıkatsııalar mınıstri Dáýren Abaev buǵan deıin Eńbek jáne halyqty áleýmettik qorǵaý mınıstri Mádına Ábilqasymovanyń otstavkaǵa ketýi jónindegi áleýmettik jelidegi talapqa qatysty pikirin bildirgen bolatyn.
«Alaıda, meniń oıymsha, balalardyń ólimine mınıstr Ábilqasymovaǵa ǵana bar kináni artý ádiletsiz bolar edi. Kelisemin, eshkim de jaýapkershilikten jaltarmaýy kerek. Aınalyp kelgende, biz - búkil memlekettik apparat - elimizde bolyp jatqan barlyq jaılarǵa jaýaptymyz.
Bir nárseni túsinýimiz kerek, osy qaıǵyly oqıǵaǵa bir ǵana emes, birneshe faktor sebep boldy jáne barlyq máseleni Eńbek jáne halyqty áleýmettik qorǵaý mınıstrliginiń jumysy sheshe alady deýge kelmeıdi. Mádına Erasylqyzynyń ózi de, áıel retinde, úsh balanyń anasy retinde bul jaǵdaıdy aýyr qabyldady. Sol sebepti, tek konstrýktıvti syn qalyp, arandatý toqtaıdy degen úmittemin. Onyń ústine men mınıstr Ábilqasymovany óz isine adal kásibı maman retinde bilemin», - degen edi Dáýren Abaev.
