«Analar úıinde» turyp jatqan jetim qyz baspanaly boldy
TALDYQORǴAN. QazAqparat - Búgin Taldyqorǵandaǵy «Aınalaıyn» balalar úıiniń túlegi, jalǵyzbasty ana Gúlim Núrkebaı baspanaly boldy. Páter kiltin oǵan Almaty oblysy ákiminiń orynbasary Jaqsylyq Omar tapsyrdy. Gúlim buǵan deıin kishkentaı sábıimen birge «Analar úıin» panalaǵan bolatyn, dep habarlaıdy QazAqparat tilshisi.
Gúlimniń basyna túsken qıyn taǵdyrdy jergilikti telearna kórsetip, sol baǵdarlamadan keıin G. Núrkebaıdy oblys ákimi Amandyq Batalov qabyldady. Onyń baspana máselesin sheshýge ýáde berdi. Alty aılyq Anelııa esimdi sábıimen birge Gúlim endi Taldyqorǵan qalasyndaǵy Pokryshkın kóshesiniń turǵyny atandy.
Gúlim Núrkebaı Kerbulaq aýdanynda dúnıege kelgen. Ol 12 jasynan bastap týǵan sińlisi ekeýi «Aınalaıyn» balalar úıinde tárbıelengen. Anasynan erte aıyrylǵan Gúlim ákesinen beıhabar. Sózinshe, eki jasta bolǵanda anasy ákesimen ajyrasyp ketken. Taǵdyr tálkegine ushyraǵan jáýdir kóz ár jerde jumys istep, nápaqasyn tapqan. Kolledjde bilim alyp, maman atanǵan. 24 jastaǵy Gúlim Núrkebaıdyń aıtýynsha, alty jyl kóńili jarasqan jigitiniń ata-anasy onyń jetimdigin betine basyp, úılenýlerine túbegeıli qarsylyq bildirgen.
«Meniń týystarym bar, myna jetim qyzdy kelinim dep elderge qalaı kórsetemin. Eger osy qyzǵa úılenetin bolsań, men anańmen ajyrasyp ketemin. Toıymyz aldynda ákesi osylaı qarsylyq bildirdi», - dedi Gúlim.
Onyń sózine qaraǵanda, keıin súıiktisiniń úıine aıaǵynyń aýyr ekenin aıtyp barǵan. Biraq jigittiń áke-sheshesi tún ortasynda úıden qýyp shyqqan. Ol óziniń turǵylyqty meken-jaıynyń durys bolmaýyna baılanysty dúnıege kelgen balasyna járdemaqy da ala almaǵan. Gúlimniń ózinen úlken eki apaıy bar.
«Biraq olardyń maǵan kómek kórsetetin shamasy joq», - deıdi ol.
Aıta keteıik, Almaty oblysynyń ákimdigi 2015 jyly Taldyqorǵanda 60 páterli kópqabatty úı salyp, ata-ana qamqorlyǵynsyz qalǵan balalarǵa bergen bolatyn.
