«Analar úıi» 3 myńnan astam jalǵyz basty anaǵa pana bolǵan
Bul áleýmettik jobany qazaqstandyq bıznesmender qolǵa alǵan bolatyn.
Qazir daǵdarys ortalyqtarynda balasymen jalǵyz qalyp, taǵdyr tálkegine ushyraǵan áıelder pana tapqan.
«5 jylda bıznesmenderdiń bastamasy jańa týǵan balalardyń kópshiliginiń ómirin arashalap qaldy. Qazir elde 25 daǵdarys ortalyǵy jumys istep tur. Olarǵa 18 bıznesmen qol ushyn sozyp otyr. Búginde 233 áıel men 1,5 jas shamasynda 206 bala ómir súrip jatyr. Olardyń qatarynda 32 júkti áıel bar. Bizdiń qor myńdaǵan áıelge kómek kórsetti. Olardyń balalary balalar úıiniń tabaldyryǵyn attaǵan joq», - dedi «Ana úıi» qoǵamdyq qorynan.
Aıta ketý kerek, daǵdarys ortalyǵyna 30 jasqa jetpegen áıelder de kele alady.
«Ana úıi 30 jasqa deıingi júkti kelinshekterge, nemese 1,5 jastaǵy balasy bar analardy qabyldaıdy. Olardyń kópshiligi balasynan bas tartqysy kelgen. Ana úıinde olar 1 jyldaı tegin ystyq tamaq, baspana, medıtsınalyq kómek alady», - dedi qor ókilderi.
Taǵdyr tálkegimen osynda túsken kelinshekterdiń biri - Shynar.
Kelinshek bala kezinen ógeı ákesimen, sodan týǵan baýyrlarymen birge ósken. Ýaqyt óte kele olardyń arasynda ózin qorash sezinip, jyraqtaý kerektigin túsinedi.
«Mektep bitirgen soń dúkenge jumysqa turdym. Sonda bolashaq kúıeýimmen tanystym. Az kúndik tatý-tátti ómirden soń kúıeýim úıge kelýdi sıretti. Tipti kelmeıtin boldy. Meniń suraǵyma jaýap bermeıtin. Arasynda qol kótere bastady. Balamdy qushaqtap qaıtadan shesheme bardym. Onda da ógeı ákem meni syıǵyzbaı qoıdy. Basqa barar jer, basar taýym bolmaǵan soń osynda keldim. Osyndaı qoldaýdan soń men kúsh aldym. Ómir súrýime úmit paıda boldy», - dedi kelinshek.
Ortalyqta jalǵyzbasty analar qujattaryn qalpyna keltirý, járdemaqy alý, alıment tóleý sııaqty kómek ala alady.
«Barlyq ortalyqtarda tigin sheberhanasy, kompıýterlik klastar ashylǵan. Ana úıinen shyǵarda jalǵyzbasty analar jumysqa ornalastyrylady. Óıtkeni, ol balasyn ary qaraı ózi asyraýy kerek», - dedi qor ókilderi.
Qazirgi tańda osyndaı ortalyqtar Almaty, Semeı, Óskemen, Aktóbe, Atyraý, Pavlodar, Taraz, Taldyqorǵan, Qaraǵandy, Qostanaı, Petropavl, Astana, Aqtaý, Shymkent, Oral, Jezqazǵan, Qyzylorda, Arqalyq, Kókshetaý qalalarynda ashylǵan.