Analar ólim-jitiminiń 55,5% elimizdiń ońtústik óńirleriniń úlesine tıesili - QR DSÁDM
ASTANA. QazAqparat - 2014 jylǵy 11 aıdyń qorytyndysy boıynsha elimizde týylǵan balalardyń jartysynan astamy jáne analar ólim-jitiminiń 55,5% ońtústik óńirlerdiń úlesine tıesili, dep habarlaıdy QR DSÁDM baspasóz qyzmetinen.
QR Densaýlyq saqtaý jáne áleýmettik damý birinshi vıtse-mınıstri S.Qaıyrbekovanyń Jambyl oblysyna jumys sapary sheńberinde Taraz qalasynda ana men náresteler ólimin, qan aınalymy júıesi aýrýlarynan bolatyn ólim-jitimdi azaıtý úshin jedel sharalar qabyldaý jónindegi respýblıkalyq shtabtyń kóshpeli otyrysyn ótkizdi.
Jıynǵa elimizdiń ońtústik óńirleri: Qyzylorda, Ońtústik Qazaqstan, Jambyl oblystary jáne Almaty qalasynyń densaýlyq saqtaý basqarmalarynyń jetekshileri, Akýsherlik, gınekologııa jáne perınotologııa ǵylymı ortalyǵy, Pedıatrııa jáne balalar hırýrgııasy ǵylymı ortalyǵy jáne Qazaq medıtsınalyq úzdiksiz bilim berý ýnıversıtetiniń basshylary jınaldy. Qalǵan óńirler selektorlyq rejimde qatysty.
Otyrysta Qyzylorda, Ońtústik Qazaqstan jáne Jambyl oblystarynda oryn alǵan analar jáne náresteler ólimi jaǵdaılary qaraldy.
Baıandama jasaýshylar 2014 jylǵy 11 aıdyń qorytyndysynda elimizde týylǵan balalardyń jartysynan astamy jáne analar ólim-jitiminiń 55,5% ońtústik óńirlerdiń úlesine tıetinin alǵa tartty.
Analar ólim-jitimi oqıǵalary oryn alǵan óńirler jetekshileri, perınataldyq ortalyqtar men perzenthanalardyń bas dárigerleri medıtsınalyq kómektiń qoljetimdiligi men sapasyn arttyrý baǵytynda jasalyp jatqan is-sharalar týraly baıandady.
Salıdat Qaıyrbekova BUU Myńjyldyqtyń damý maqsattaryna jetý jáne álemniń eń damyǵan 30 eliniń qataryna kirý densaýlyq saqtaý júıesi úshin basym baǵyttardyń biri ekenin alǵa tartty. Al bul salada ana men bala densaýlyǵyn saqtaý basty kórsetkishterdiń biri.
«Densaýlyq saqtaý jáne áleýmettik damý mınıstrliginiń shaqyrýymen, qazir Qazaqstanda analar ólim-jitimi kórsetkishterin baǵalaý úshin Dúnıejúzilik densaýlyq saqtaý uıymynyń halyqaralyq táýelsiz sarapshylar toby jumys istep jatyr», - dedi ol.
Birinshi vıtse-mınıstr sońǵy jyldary elimizde bul salada aýqymdy jumystar atqarylyp, kórsetkishter eleýli túrde jaqsarǵanyn atap ótti. Perzenthanalar men balalardy emdeý uıymdaryn materıaldyq-tehnıkalyq jabdyqtaý jaqsarty, tıimdi halyqaralyq tehnologııalar, dıagnostıkalaý men emdeý standarttary men hattamalary engizilýde. Ana men bala densaýlyǵyn qorǵaý qyzmetine jasalǵan saraptama alǵashqy kómek býyny belsendi jumys isteı bastaǵanyn kórsetken. Táýekeli joǵary áıelderdi ýaqtyly emdeýge jatqyzý barlyq jerde jolǵa qoıyldy.
Sonymen qatar elimizde balalar men analar óliminiń tómendeýine júkti áıelderdi táýlik boıy monıtorıng júrgizý júıesiniń engizilýi jáne tarıfke engizilgen qarajat esebinen dárigerlerdiń biliktiligin arttyrý oń septigin tıgizdi.
Sońǵy 5 jylda elimizde analar ólimi - 3 esege, náresteler ólimi - 1,5 esege azaıdy.
«Qazaqstandyqtardyń ortasha ómir súrý uzaqtyǵyn arttyrýǵa jáne ólim-jitimdi azaıtýǵa múmkindikterimiz ben áleýetimiz bar. Eń aldymen, ol sektoraralyq ózara árekettestikke qatysty, óıtkeni adam densaýlyǵynyń 70-80%-y onyń ómir súrý salty men qorshaǵan ortasyna baılanysty», - dedi birinshi vıtse-mınıstr.
