Analar altynnan alqa taqty - Semeı
ASTANA. 21 jeltoqsan. QazAqparat - Semeıde qala ákimdigi ǵımaratynda kópbalaly analarǵa altyn jáne kúmis alqalar tabystalyp, qurmet kórsetildi.
Semeı qalasy ákiminiń orynbasary Záýresh Isabaeva men qalalyq ardagerler keńesiniń tóraǵasy Amantaı Doǵalaqov on bir anaǵa altyn jáne kúmis alqasyn taǵyp, óz quttyqtaýlaryn jetkizdi, dep habarlady qala ákiminiń baspasóz qyzmetinen..
Alqa alǵan analar budan bylaı qoǵamdyq kólikte tegin júrýge múmkindik alyp, zeınetaqysyna qosymsha qarjy qosylady. Bul da memleket tarapynan kópbalaly analarǵa kórsetilgen kómek. Analarǵa qurmet kórsetý, olardyń eseli eńbekterin baǵalaý Elbasy Jarlyǵyna sáıkes júzege asyp kele jatyr.
-Biz az ult bolǵanymyzben, myqty, qaısar halyqpyz. Myqtylyqtyń arqasynda osy Táýelsizdikke qol jetkizdik. Sizderden órgen ul men qyzdyń arqasynda biz halyq bolyp otyrmyz. Qaı zamanda bolmasyn ulǵa qonys, qyzǵa óris taptyńyzdar. Mine endi osynyń arqasynda ataq alyp, dárejelerińiz bıiktep otyr, - dep atap ótti óz quttyqtaý sózinde Semeı qalasy ákiminiń orynbasary Záýresh Ramazanqyzy.
Altynnan alqa taqqan analar qatarynda Bıjan apa Eskenova da bar. Seksenniń seńgirine shyqqan aq jaýlyqty ana segiz balany tárbıelep ósirdi. Úsh ul men bes qyz óz oryndaryn tapty. Úıdiń úlkeni elýdi eńserse, kenjesi orda buzar otyzdan asqan. Bıjan apanyń bar baılyǵy da osy balalary.
-Balalarym dep eńbek ettim. Qatardan qaldyrmadym. Shúkir, nemere men shóbereniń ortasyndamyn. Osy kúnge jetkizgen birinshi - Alla, ekinshi - Táýelsiz beıbit elimiz. Erkindiktiń arqasynda qyzyǵy mol kúnderim bala-shaǵa ortasynda ótip jatyr. Elime, elim degen azamattarǵa amandyq tileımin, - dep tilegin bildirdi Bıjan ana.
