Anaklııa porty: Grýzııadaǵy mańyzdy ınfraqurylymdyq joba jańa kezeńge ótti
ASTANA. KAZINFORM — Grýzııanyń tereń sýly teńiz porty – Anaklııa qurylysy belgilengen keste boıynsha jalǵasýda. Bul týraly «Anaklııa teńiz porty» kompanııasynyń dırektory Zýrab Sıchınava málimdedi, dep habarlaıdy Kazinform agenttiginiń menshikti tilshisi News Georgia basylymyna silteme jasap.
Sıchınavanyń aıtýynsha, qazirgi ýaqytta joba aıasyndaǵy birinshi kezeń aıaqtalýǵa jaqyn. Ol mobılızatsııa, ınjenerlik zertteýler jáne tolyq jobalyq ázirleýdi qamtıdy. Qurylys jumystaryn halyqaralyq tenderde jeńiske jetken belgııalyq Jan De Nul kompanııasy júrgizip jatyr. Jobanyń jalpy uzaqtyǵy — 970 kún.
Qurylys barysy
Qazirgi tańda tolqyn bógetin salýǵa qajetti taý jynystarynyń 80%-y qurylys alańyna jetkizildi.
Sonymen qatar ýaqytsha aılaq úshin beton X-bloktaryn jasaý belsendi túrde júrip jatyr. Bul aılaq 2025 jyldyń qazan aıynda daıyn bolady dep josparlanǵan.
Bloktar port aýmaǵynda óndirilýde — munda beton zaýyty men qurylys materıaldaryn óńdeıtin jabdyqtar jumys istep tur. Aptasyna shamamen 240 blok daıyndalady.
Injenerlik jumystar
Tolqyn bógetiniń alǵashqy 650 metri jobalanyp bitti. Qalǵan bóligi 10 tamyzǵa deıin usynylady.
Qazirgi ýaqytta batımetrııalyq jáne topografııalyq zertteýler júrgizilýde.
Jaqyn kúnderi GPS-monıtorıng júıesi jáne tolqyn men sý laılylyǵyn ólsheıtin jabdyqtar ornatylady.
Ekinshi kezeń men strategııalyq mańyzdylyǵy
2025 jyldyń kúzinde bastalatyn ekinshi kezeńde teńiz túbin tereńdetý jáne aılaqty kemelerdi qabyldaýǵa daıyndaý jumystary bastalyp, 2027 jyldyń mamyrynda aıaqtalýy tıis.
Anaklııa porty – Qytaı, Ortalyq Azııa, Kavkaz jáne Eýropany baılanystyratyn Orta dálizdiń (Transkaspıı halyqaralyq kólik baǵyty) negizgi bóligi retinde qarastyrylyp otyr. Porttyń tereń sý aılaǵy men zamanaýı logıstıkalyq múmkindikteri iri tonnajdy kemelerdi qabyldaýǵa jáne jylyna 600 myń konteınerge deıin óńdeýge múmkindik beredi (2029 jyly birinshi kezeń aıaqtalǵan soń).
Qazaqstan úshin mańyzy
Qazaqstan úshin Anaklııa porty – Qara teńizge shyǵatyn jańa balama jol. Sarapshylardyń aıtýynsha, bul joba Qazaqstannyń eksporttyq jáne tranzıttik áleýetiniń turaqtylyǵyn arttyra alady, ásirese Orta dálizdiń geoekonomıkalyq mańyzy artyp jatqan qazirgi kezeńde.
Investıtsııa jáne ıelik máselesi
Joba kópjyldyq kidiriske qaramastan, 2024 jyldyń mamyrynda Grýzııa úkimeti porttyń 49%-yn qytaılyq China Communications Construction Company (CCCC) jáne sıngapýrlyq China Harbour Investment kompanııalarynan quralǵan konsortsıýmǵa berýge nıetti ekenin málimdegen. Alaıda, ınvestıtsııalyq kelisim áli qol qoıylǵan joq.
Soǵan qaramastan, Grýzııa bıligi jobanyń ýaqytyly júzege asatynyna senimdi jáne oǵan 600 mıllıon dollar ınvestıtsııa tartýdy kózdep otyr.
Eske sala keteıik, buǵan deıin Potı portynda Qazaqstannyń alǵashqy mýltımodaldy termınaly iske qosylǵan bolatyn.
Sonymen qatar, «Tbılısı Qurǵaq porty» bıylǵy mamyr aıynda jumysyn bastap, oǵan yńǵaıly temirjol jelisi iske qosyldy.