«Anaǵa qurmet» mýzeıine 100 jasaǵan maqtashynyń jádigerleri tabystaldy
ASTANA. KAZINFORM — 18 qazan kúni Almaty oblysynyń Qarasaı aýdanyndaǵy «Anaǵa qurmet» mýzeıinde «Jumysshy mamandyqtar jylyna» oraı maqtashy Sársenkúl Ryspekqyzynyń eskertkish buryshy ashylady. Belgili psıhoanalız mamany Anna Qudııarova bul múıis tek óz anasyna ǵana emes, adal eńbekti tý etken búkil qazaq áıelderiniń qurmetine arnap ashylyp jatqanyn aıtady.
Eńbek ardageri kezinde Qazaqstan Joǵary Keńesiniń eki márte depýtaty bolǵan. 100 jasqa tolýyna 40 kún qalǵanda ómirden ozǵan.
— Anamyz 1924 jyly 8 naýryzda ómirge kelgen. Ol byltyr 100 jasyna 40 kún qalǵanda ómirden ozdy. Anamnyń kóılegi, tigin mashınasy, keli-kelsaby sııaqty eskiniń kózi bolǵan zattaryn, 1958 jyldan beri anam týraly materıal jarııalaǵan gazet-jýrnal qıyndylaryn, «Tyl ardageri» medalin «Anaǵa qurmet» mýzeıine tapsyrdyq, — dedi Anna Qudııarova.
Aıtýynsha, Sársenkúl áje soǵys jyldary Tashkenttegi oq shyǵaratyn áskerı zaýytta jumys istegen.
— Ol bul jumysyn «maıdanǵa qosqan úlesim» dep aıtatyn. Anam ójet, pysyq qyz bolǵan eken. Qudııar atam anamnyń pysyqtyǵyna qyzyǵyp, naǵashy ájeme quda túsip, anam Sársenkúl men ákem Mergenbaı sol kezdiń saltymen nan úzip, otbasy qurypty, — deıdi Anna Qudııarova.
Sársenkúl Ryspekqyzy 1958 jyly «Maqta ósirýdiń ozaty» atanyp, Almaty men Máskeýde ótken respýblıkalyq jáne búkilodaqtyq ozat maqtashylar sezine qatysqan. Sol sharada túsken sýreti, oǵan syılaǵan tigin mashınasy men teledıdar da «Anaǵa qurmet» mýzeıine tabystalypty.
Anna Qudııarova anasy osy ǵasyrda ómir keshse, isker hanymdardyń qatarynda júretin edi degen oı aıtyp qaldy.
— Qazirgi tilmen aıtqanda, anam bızneske beıim adam. Ol baı-aýqatty adamnyń qyzy bolǵan. Bala kezden molshylyqta ósken. Biraq Keńes Odaǵy kezinde molshylyqta ómir súrýge bolmaıtyn. Táýelsizdik alǵan jyldary ol qaýyn-qarbyz ósirip, Reseıge satatyn. Anam týraly estelik kóp. Ol eńbekqorlyqtyń, qaısarlyqtyń sımvoly. Óz zamanynda erinbeı eńbek etip, urpaǵyna úlgi bola bilgen tulǵa, — dedi Anna Qudııarova.
Aıta ketý kerek «Anaǵa taǵzym» mýzeıinde 500-ge jýyq qundy jádiger saqtaýly tur.
Buǵan deıin elordadaǵy Ulttyq mýzeı janynan Restavratsııa ortalyǵy qurylatynyn jazǵan edik.