«Anaǵa aparar jol» Ortalyq Azııanyń úzdik fılmi atandy
ALMATY. QazAqparat - «Anaǵa aparar jol» fılmi «Aq ilbis» kınojúldesiniń bas júldesine ıe boldy, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasaı otyryp.
«QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ-nyń «Novyı mır» JShS-niń qatysýymen túsirgen «Anaǵa aparar jol» fılmi Bishkekte ótken «Aq ilbis» atty VI ulttyq kınojúldesinde Ortalyq Azııanyń úzdik fılmi atandy», - delingen habarlamada.
Bas prodıýser Álııa Nazarbaeva men rejısser Aqan Sataevtyń birlesip shyǵarǵan «Anaǵa aparar jol» atty týyndysy úsh nomınatsııa boıynsha, atap aıtsaq, «Ortalyq Azııanyń úzdik fılmi», «Ortalyq Azııanyń úzdik akteri» (úmitker bolǵan - akter Ádil Ahmetov), «Ortalyq Azııanyń úzdik aktrısasy» (úmitker bolǵan - aktrısa Altynaı Nógerbek) nomınatsııalary boıynsha qatysqan. Sondaı-aq, osy júldelerge Ózbekstan men Tájikstannyń kartınalary da usynylǵan bolatyn.
Ulttyq júldeni rejısser Aqan Sataevqa qyrǵyzdyń kınorejısseri, Qyrǵyzstan Respýblıkasynyń halyq artısi, atalmysh premııanyń quryltaıshylarynyń biri Artyqbaı Súıindikov jáne Los-Anjelestegi azııalyq kınofestıvaliniń úılestirýshisi Ásel Shernııazova tabystady.
«Túsirý tobyn osy jeńispen qýttyqtaımyn. «Anaǵa aparar jol» - Ortalyq Azııanyń úzdik fılmi», - dep jazdy rejısser Aqan Sataev Instagram-daǵy óziniń paraqshasynda.
Fılm ómirdiń aýyrtpalyǵyna tótep bergen, qıyn qystaý kúnderi surapyl soǵystyń mehnatyn kórgen basty keıipkerdiń taǵdyryn baıandaıdy. Kınotýyndy ananyń perzentine degen sheksiz mahabbaty týraly, perzentiniń Otanyna degen adaldyǵy jaıly baıandaıdy. Atalǵan kartına 38-shi Halyqaralyq Máskeý kınofestıvalinde jáne «Eýrazııalyq kópir» atty festıvalge qatysyp, bas júldeni ıemdense, aktrısa Altynaı Nógerbek «Úzdik áıel adam róli» nomınatsııasynda jeńiske jetti. Odan bólek, bul týyndy bıyl Qazaqstan kınosynshylary qaýymdastyǵy uıymdastyrǵan «Synshylar tańdaýy» atalymynda úsh birdeı júldeni ıemdendi. Atap aıtsaq, «Eń úzdik aktrısa» retinde - Altynaı Nógerbek, «Ekinshi plandaǵy úzdik aktrısa» retinde Arýjan Jazylbekova tanyldy. Al «Fılmge jazylǵan úzdik mýzyka» nomınatsııasyn atalmysh kartına kompozıtorlary Álim Zaırov pen Roman Vıshnevskıı bólisti.
2012 jyly Qyrǵyzstannyń tanymal kınematografısteri uıymdastyrǵan «Aq ilbis» atty tuńǵysh ulttyq kınojúldesi ótken jyldyń úzdik fılmderin anyqtaıtyn eleýli is-shara. Kınojúlde Qyrǵyzstannyń kınematografıster odaǵynyń, «Aıtysh» qoǵamdyq uıymy men Qyrǵyzstan Respýblıkasynyń kınodamytý qorynyń qoldaýymen tapsyrylady. «Ortalyq Azııanyń úzdik fılmi» nomınatsııasy alǵash ret 2010 jyly tabystaldy.
