«Anaǵa aparar jol» fılmi Grekııada kórsetiledi
ASTANA. QazAqparat - 24 mamyrda Grekııanyń Aharnon qalasynda Qazaqstan men Grekııa arasyndaǵy dıplomatııalyq qatynastarynyń 25-jyldyǵyna oraı «Anaǵa aparar jol» fılmi kórsetiledi.
Mádenı is-sharany elimizdiń Grekııa Respýblıkasyndaǵy Elshiligi, QR Mádenıet jáne sport mınıstrligi jáne Sh.Aımanov atyndaǵy «Qazaqfılm» AQ uıymdastyryp otyr.
Rejısser Aqan Sataev túsirgen fılm ómirdiń aýyrtpalyǵyna tótep bergen, qıyn qystaý kúnderi surapyl soǵystyń mehnatyn kórgen basty keıipkerdiń taǵdyryn baıandaıdy. Oqıǵanyń negizgi jelisi qazaq halqynyń basyna túsken aýyr kezeńdi - ujymdastyrý, jut, soǵys jáne soǵystan keıingi jyldardy qamtıdy.
Esterińizge sala ketsek, atalǵan tarıhı týyndy 38-shi Halyqaralyq Máskeý kınofestıvalinde jáne «Eýrazııalyq kópir» atty festıvalge qatysyp, Bas júldeni, sonymen qatar aktrısa Altynaı Nógerbek «Úzdik áıel adam róli» nomınatsııasynda jeńiske jetti.
Odan bólek, bul týyndy bıyl Qazaqstan kınosynshylar assotsıatsııasy uıymdastyrǵan «Synshylar tańdaýy» júldesinde úsh birdeı júldeni ıemdendi. Atap aıtsaq, «Eń úzdik aktrısa» - Altynaı Nógerbek; «Ekinshi plandaǵy úzdik aktrısa» Arýjan Jazylbekova; «Fılmge jazylǵan úzdik mýzyka» nomınatsııasyn atalmysh fılmniń kompozıtorlary Álim Zaırov pen Roman Vıshnevskıı ıemdendi. Odan bólek, kınotýyndy jaqynda ǵana Bishkekte ótken «Aq ilbiris» atty VI ulttyq kınojúldesinde Ortalyq Azııanyń úzdik fılmi atandy.
«Anaǵa aparar jol» fılmi 24 mamyrda saǵat 19:00-de Aharnon ákimdigi zalynda kórsetiledi. Kirý tegin.
