«Anaǵa aparar jol» fılmi AQSh-ta prokatqa shyǵyp, Netflix kórsete bastaıdy
ALMATY. QazAqparat - «Anaǵa aparar jol» fılmi 24 mamyrdan bastap AQSh-ta prokatqa shyǵady, dep habarlaıdy QazAqparat «Qazaqfılm» kınostýdııasyna silteme jasap.
QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ «Novyı mır» jáne Sataifilm kompanııalary birlesip túsirgen fılm Los-Andjeles (Kalıfornııa shtaty), Hartford (Konnektıkýt shtaty), Hıýston (Tehas shtaty) jáne Neshvıll (Tennessı shtaty) qalalaryndaǵy kınoteatrlarda kórsetiledi. Odan bólek, amerıkalyq prokattan keıin (90 kún ótken soń) bul fılmdi Netflix kompanııasynyń strımıng-platformasy (aǵymdaǵy onlaın kórsetilim) jáne VOD (suratý boıynsha fılmdi kórý) sandyq taralymy arqyly tamashalaýǵa bolady.
Esterińizge sala ketsek, «Anaǵa aparar jol» fılmi Qazaqstan atynan «Oskar» jáne «Altyn globýsqa» «Úzdik shetel fılmi» atalymynda usynylǵan bolatyn.
«Anaǵa aparar jol» fılminiń AQSh-taǵy dıstrıbıýtsııasyn amerıkalyq World Wide Motion Pictures Corporation kompanııasy qolǵa alǵan. 1977 jyly negizi qalanǵan bul kompanııa kórkem, derekti, qysqametrajdy fılmderdi jáne televızııalyq jobalardy qarjylandyryp qana qoımaı, olardy óndiriske jiberip, tipti prokatqa shyǵýǵa kómektesedi. Kompanııanyń ár jyldardaǵy top-menedjerleri kóptegen kıno jáne televızııalyq jobalarǵa, «Oskar» jáne «Emmı» premııalaryn jáne basqa da bedeldi júldederdi jeńip alǵan jobalarǵa keńes berip, olarǵa prodıýserlik qyzmet kórsetken.
Tarıhı kınotýyndynyń bas prodıýseri Álııa Nazarbaeva, al rejısseri Aqan Sataev. «Anaǵa aparar jol» fılminde elimizdiń tanymal akterleri ̶ Altynaı Nógerbek, Ádil Ahmetov, Arýjan Jazylbekova, Berik Aıtjanov, Bolat Ábdilmanov túsken. Bul fılmnen kórermen qazaq otbasysynyń 1930 jyldardan bastap, kúni búginge deıingi bastan keshkenin kóre alady.
«Prodıýserlerimizge, túsirilim tobymyzǵa jáne maǵan da bizdiń fılmimizdi AQSh kınoteatrlarynda kórsetetini úlken abyroı. «World Wide Motion Pictures Corporation» kompanııasy fılmimizden shynaıylyqty kórip, ondaǵy oqıǵa jelisi álemniń barlyq aýdıtorııasyna uǵynyqty bolatynyna senim bildirgenine qýanyp otyrmyn», ̵ dedi bul týrasynda rejısser Aqan Sataev.
«Bizdiń kompanııa birneshe urpaqtyń tarıhyn baıandaıtyn, onyń ústine «Oskar» premııasyna ilgeride usynylǵan tereń dramany prokattaýdy maqtan sanaımyz», ̵ degen «World Wide Motion Pictures Corporation» kompanııasynyń bas dırektory Pol D. Henkok sózin bylaı dep jalǵastyrdy: «Amerıkalyq otbasylar, ásirese analar qaýymy janǵa jylý syılaıtyn fılmdi qýana kóredi».
Aıta ketelik, «Anaǵa aparar jol» fılminiń tusaýkeseri 38-shi Halyqaralyq Máskeý kınofestıvalinde ótip, synshylardyń oń baǵasyn alǵan. Sonymen qatar, fılm túrli kınofestıvalderden júlde alyp, halyqaralyq kórsetilimderi ótken.
