Ana tilińdi umytsań, qazaq emessiń: 4 jasynda AQSh-qa kóship ketken qazaq balasy suhbat berdi
ASTANA. KAZINFORM — 4 jasynda AQSh-qa kóship ketken qazaq balasy Qazaqstanǵa qaıta oraldy. Jibek Joly arnasyndaǵy «Búgin LIVE» baǵdarlamasyna suhbat bergen Saıat Nokerban tikeleı efırde elge degen saǵynyshyn jetkizdi.
— AQSh-qa 4 jasymda kettim. Qazaqstannan ketkenime 14 jyl ótti. Elimdi saǵyndym. Munda kele sala týysqandarymmen kezdestim. AQSh-ta anam men úlken aǵam qaldy. Kóp týysym «Saıat bizben birge turady» dep talasypty. Meni áýejaıda kóp adam kútip aldy. Bul Qazaqstanǵa úshinshi ret kelýim. Óte qýanyshtymyn, — dedi AQSh azamaty.
Qazir Saıat Tehas ýnıversıtetinde qarjy mamandyǵy boıynsha bilim alyp jatyr. Sonymen qatar bankte jumys isteıdi. Úsh apta buryn áleýmettik jelide paraqsha júrgizýdi bastaǵan. Qysqa ýaqyt ishinde onyń kontenti 180 myńnan astam tirkelýshi jınapty.
— Men qazirgi ýaqytta Ostındegi Tehas ýnıversıtetinde «Qarjy» mamandyǵynda oqımyn. Bankte jumys isteımin. Paraqshamdy úsh apta buryn júrgize bastadym. Úsh apta ishinde 180 myń tirkelýshi jınaldy. Meniń kontentim sheteldikterge, amerıkalyqtarǵa qyzyq. Olar Ortalyq Azııa týraly bilgisi keledi. Bizdiń ómirimiz, mádenıetimiz olar úshin erekshe. Qazaqstanda metroda, avtobýsta adamdarmen ońaı sóılesip ketýge bolady. Al AQSh-ta ondaı emes. Bizde kóp nárse basqasha. Arhıtektýra da, mádenıet te. Biraq mýzeılerimiz uqsas. Men kóp mýzeıge bardym. Ǵylym men tarıh taqyryptary boıynsha óte jaqyn, — deıdi ol.
Stýdııa qonaǵy aǵylshyn tildi ortada júrgenimen, qazaq tilin umytpaǵan.
— Men anammen qazaq tilinde sóılesemin, amerıkalyq ákemmen aǵylshynsha. Kishkentaı kezimnen anam «ana tilińdi umytsań, sen shyn qazaq emessiń» dep aıtatyn. Bul meniń mıymda qalyp qoıdy. Qazir de qazaq tilimdi damytýǵa tyrysamyn. Týystarymmen WhatsApp arqyly sóılesemiz. Ondaǵy toptyń ataýy da «Baýyrlar» dep atalady, — deıdi amerıkalyq azamat.
Qazaqstanǵa eki jarym apta buryn ǵana kelgen Saıat eń áýeli anasy dúnıege kelgen Kegen aýylyna at basyn burypty.
— Men Kegen aýylyna bardym. Ol — anamnyń balalyq shaǵy ótken aýyl. Sol jaqta atqa mindim, qurt jasadym, sıyr saýdym. Aýyl ómiri qatty unady. Álemdegi adamdarǵa kórsetý úshin durystap kontent túsirdim, — deıdi bloger.
Amerıkalyq qazaq buǵan deıin ánshilik, akterlikpen aınalysqan. Tipti óziniń qazaq tilinde jaryq kórgen áni de bar. Saıattyń aıtýynsha, sheteldegi aýdıtorııasy onyń qazaq ekenin bilgende aıryqsha qyzyǵýshylyq bildiripti.
— Buryn men ánshi, akter bolǵanmyn. Sol týraly kontent jasaıtynmyn. Ánderimdi ózim jazamyn. Ánderim ómirim týraly — ákemniń joqtyǵy, qyzdar týraly. Jaqynda «Qolyńdy alshy» degen alǵashqy ánim shyqty. Bul ándi anammen beshbarmaq jasap jatqanda jazdym. Qazaq ekenimdi aıtqan soń, adamdar suraq qoıa bastady. Sol úshin mádenıetimiz týraly kontent jasaıtyn boldym. Olar qazaqtar týraly kóp bilmeıdi. Gennadıı Golovkın, Dımash, Shavkat sııaqty tanymal adamdar bar. Biraq jalpy mádenıetimiz, ómirimiz, tarıhymyz týraly túsinik joq. Men ózimniń arǵyn, orta júz ekenimdi aıttym. Aýyldan shyqqanymdy, qalaı ómir súretinimdi kórsettim. Taý, kólderdi de túsirip kórsettim, — deıdi Saıat Nokerban.
Ol AQSh-ta júrip, ulttyq taǵamdardy saǵynatynyn da jasyrmady.
— BBC News-pen suhbattasqanda olar menen qandaı tamaqty jaqsy kóretinimdi surady. Men bárin jaqsy kórem. Manty, laǵman, beshbarmaq bárin jegim keledi. Bir apta buryn alǵash ret jylqy etin jedim. Biz jaqta jylqy joq qoı. Óte dámdi boldy, — deıdi stýdııa qonaǵy.
Qazaqtardyń qonaqjaılyǵy men ulttyq tárbıesi Saıattyń dostaryn da tańǵaldyrypty.
— Dostarym úıge kelse, anam palaý, manty daıyndap beredi. Olar «Seniń anańdy qatty jaqsy kóremiz» deıdi. AQSh-ta ondaı emes qoı. Qazaqstanda jańa adamdar úıge kelse, «sháı ish», «tamaq je» dep qarsy alady. Biraq AQSh-ta ondaı dástúr joq. Anam qatty tyrysady. Kishkentaıymnan maǵan qazaq óleńderin oqytatyn. Tamaq jasap jatqanda árqashan qazaqsha án qoıatyn. Men bala kezimnen «MýzArt» tobyn jaqsy kóremin, — deıdi ol.
Aıta keteıik, 14 maýsym kúni AQSh-ta Trampqa qarsy iri narazylyq aktsııasy ótpek.