«Ana tili» zııatkerlik olımpıadasynyń jeńimpazdary oqý granttaryna ıe boldy
ASTANA. KAZINFORM – Elimizde alǵash ret uıymdastyrylǵan «Ana tili» zııatkerlik olımpıadasynyń jeńimpazdary Astanadaǵy L.Gýmelev atyndaǵy Eýrazııa ulttyq ýnıversıtetinde marapattaldy.
Qazaqstannyń búkil óńirlerinen qatysqan 5 myń oqýshynyń ishinen sýyrylyp shyqqan 192 oqýshy Astanada bas qosyp, olımpıadanyń aqtyq kezeńinde baq synaǵan bolatyn. Bastama avtory – «Qazaq tili» halyqaralyq qoǵamy.
- Bul olımpıada «Qazaq tili» halyqaralyq qoǵamynyń uıymdastyrýymen, «Bilim-Innovatsııa» halyqaralyq qoǵamdyq qorynyń qoldaýymen, Freedom kompanııasynyń demeýshiligimen ótip jatqan shara. Mundaǵy bir maqsatymyz – sózge, ádebıetke, tilge qyzyǵýshylyǵy bar daryndy oqýshylardyń jolyn ashyp, múmkindikter usyný, bolashaq maman retinde qalyptasýyna baǵyt silteıtin alań qurý. Ekinshi jaǵynan oqýshylardyń arasynda qazaq tili pániniń tartymdylyǵyn arttyryp, bedelin kóterýdi kózdedik. Osy maqsattarǵa elimizdegi eń jetekshi bilim beretin uıymnyń biri - Bilim-Innovatsııa lıtseıleriniń tájirıbesin paıdalanýdy jón kórdik. Bul olımpıada osydan keıin jyl saıyn ótedi degen josparymyz bar, - deıdi «Qazaq tili» halyqaralyq qoǵamynyń prezıdenti Raýan Kenjehanuly.
Olımpıada alǵash ret ótkenine qaramastan oǵan Qazaqstannyń búkil óńirlerinen 5 myńǵa tarta bala qatysypty.
- Birinshi kezeń sóz saptaý mádenıeti, synı oılaý, óz ustanymyn saýatty qorǵaý baǵyttaryn qamtydy. Ekinshi «Tilshi» kezeńiniń aıasynda úmitkerlerdiń jazý, oqý, sóılem taldaý, shyǵarma men mazmundama jazý sekildi mektep aıasynda qalyptastyrylýǵa tıis qabiletteri synaldy. «Bilimpaz» kezeńi basqa pánderden alǵan bilimin qazaq tilinde pash etýge arnaldy. ıAǵnı, bul tek qazaq tili men ádebıeti pánin ǵana nasıhattap, osy baǵyttaǵy bilimin ǵana synaıtyn saıys emes. Balalardyń jan-jaqty damýyna qazaq tiliniń qalaı úles qosyp jatqanyn aıqyndaıtyn olımpıada deýge bolady, - deıdi ol.
Olımpıada jeńimpazdaryna birneshe ýnıversıtet 10-ǵa jýyq grant usynyp otyr.
- Al Freedom kompanııasy olımpıadany uıymdastyrý shyǵyndaryn, keletin oqýshylardyń júris-turys shyǵyndaryn kóterip aldy. Olımpıadada komandalyq synaqtar da, jekeleı synaqtar da ótti. Granttar sol saıystardyń bárinde úzdik nátıje kórsetken jeńimpazdarǵa beriledi, - deıdi Raýan Kenjehanuly.
«Bilim-Innovatsııa» halyqaralyq qoǵamdyq qorynyń prezıdenti Darhan Óteniń aıtýynsha, olımpıadanyń Astanada ótken aqtyq synynda 64 komandaǵa birikken 192 oqýshy qatysqan.
- Bul olımpıadanyń basqa pán olımpıadalarynan negizgi ereksheligi zııatkerlik baǵytynda. Qazirgi tańda álemde aǵylshyn tilinde ótetin zııatkerlik olımpıadalar trendke aınalyp otyr. Four C dep atap júrgen kreatıvtiliktiń 4 qyry bar. Shyǵarmashylyq, synı turǵydan oılaý, toppen jumys jáne kommýnıkatsııa qabiletterin birdeı synaıtyn format bul. Sondaı formattaǵy olımpıada ana tilinde uıymdastyrylyp otyr. Ana tili jaratylystaný ǵylymdarymen kiriktirilip jasaldy. ıAǵnı bul olımpıadada tilge ǵana qabileti bar, basqa pánderden bilimi osal bala jeńiske jete almaıdy. Bul jerde bilimdi bolý jetkiliksiz, sol bilimdi naqty ómir jaǵdaıynda qalaı paıdalana alatynyn kórsetý kerek. Ideıanyń avtory «Qazaq tili» halyqaralyq qoǵamynyń prezıdenti Raýan Kenjehanuly bolatyn, - deıdi ol.
Bul olımpıada keleshekte Oqý-aǵartý mınıstrliginiń resmı bilim saıystarynyń qataryna enetin kórinedi.
- Bıyl birinshi ret ótip otyr. Óte sátti ótkenin kórdik. Sondyqtan kelesi jyldan bastap bul saıysty Oqý-aǵartý mınıstrliginiń tizimine kirgizemiz. Sáıkesinshe olımpıadadan ozyq shyqqan oqýshylardyń ustazdaryn da sanat taǵaıyndaý turǵysynan yntalandyrý sharalary qolǵa alynady dep otyrmyz, - deıdi Darhan Óte.
Olımpıadanyń bas júldesin Túrkistan oblysynan kelgen «Dostyq» komandasy jeńip aldy.
Sonymen qatar 11-synyptyń 8 úzdik oqýshysyna elimizdiń jetekshi joǵary oqý oryndary – Abaı atyndaǵy Qazaq ulttyq pedagogıkalyq ýnıversıteti (5 grant) jáne Narxoz ýnıversıteti (3 grant), Coventry University (1 grant) bilim granttaryn tabystady.
Budan bólek, 5 komanda – «Úzdikter», 10 komanda – «Ozattar», 16 komanda – «Myqtylar», 32 komanda – «Belsendiler» atalymy boıynsha marapattaldy.
Aıta keteıik, Grýzııa qazaqstandyqtarǵa bilim grantyn bóldi.